პესკოვი: Tomahawk შეშფოთებას იწვევს, სერიოზული იარაღია, თუმცა ფრონტზე სიტუაციას ვერ შეცვლის

პუტინის პრესმდივანი დიმიტრი პესკოვი აცხადებს, რომ Tomahawk-ის რაკეტების უკრაინისთვის შესაძლო გადაცემის საკითხი რუსეთში შეშფოთებას იწვევს.

მისი თქმით, მიუხედავად იმისა, რომ ეს სერიოზული იარაღია, "ფრონტის ხაზზე სიტუაციას ვერ შეცვლის".

"Tomahawk-ის რაკეტასთან დაკავშირებული საკითხი ჩვენში უკიდურეს შეშფოთებას იწვევს, როგორც ეს უკვე განაცხადა პრეზიდენტმა პუტინმა. Tomahawk-ები სერიოზული იარაღია, მაგრამ ფრონტის ხაზზე სიტუაციის შეცვლა არ შეუძლია", - ამბობს პესკოვი.

გამოცემა Axios-მა გუშინ, 11 ოქტომბერს დაწერა, რომ აშშ-ისა და უკრაინის პრეზიდენტებმა, დონალდ ტრამპმა და ვოლოდიმირ ზელენსკიმ სატელეფონო საუბარში უკრაინისთვის Tomahawk-ის რაკეტების შესაძლო გადაცემის საკითხი განიხილეს. Axios-ის წყაროებს არ დაუკონკრეტებიათ, მიღებულია თუ არა საბოლოო გადაწყვეტილება აღნიშნულ საკითხთან დაკავშირებით.

მანამდე უკრაინის პრეზიდენტმა სოციალურ ქსელში დაწერა, რომ დონალდ ტრამპთან უკრაინის საჰაერო თავდაცვის გაძლიერების შესაძლებლობები განიხილა.