ზელენსკი: რუსებს სუმის ოლქის მიმართ გიჟური გეგმები აქვს - ამ მკვლელებს ვანადგურებთ

უკრაინის პრეზიდენტმა, ვოლოდიმირ ზელენსკიმ ყოველდღიურ ვიდეომიმართვაში განაცხადა, რომ რუსებს სუმის ოლქის მიმართ რამდენიმე "გიჟური" გეგმა ჰქონდათ, თუმცა უკრაინის ძალები მათ შეკავებას ახერხებენ.

"უმაღლესი მთავარსარდლის შტაბის სხდომაზე ფრონტის ხაზზე არსებული ვითარების შესახებ ძალიან დეტალური ანგარიში წარადგინეს. განსაკუთრებული ყურადღება სუმის ოლქსა და სასაზღვრო ზონაში განხორციელებულ მოქმედებებზე გაამახვილეს. მადლობელი ვარ ჩვენი დანაყოფების მათი გამძლეობისთვის. რუსებს იქ სხვადასხვა გეგმა და განზრახვა ჰქონდათ, რომლებიც, როგორც ყოველთვის, აბსოლუტურად გიჟური იყო. ჩვენ ვაკავებთ ამ მკვლელებს და ვანადგურებთ მათ, ვიცავთ ჩვენს სუმის ოლქს", - თქვა მან.

უკრაინის პრეზიდენტის თქმით, პარასკევს, 20 ივნისს, რუსეთმა კიდევ ერთხელ ღიად განაცხადა, რომ არ სურს ცეცხლის შეწყვეტა.

"რუსეთს ბრძოლა სურს. ეს ნიშნავს, რომ ისინი ჯერ კიდევ ვერ გრძნობენ მსოფლიოს მიერ მათზე განხორციელებული ზეწოლის ტკივილს - ან ძალიან ცდილობენ, რომ თავი მოიჩვენონ, თითქოს არ გრძნობენ ამას. რუსეთის ეკონომიკა უარესდება - მოდით, კიდევ უფრო მეტად შევუწყოთ ხელი ამ პროცესს", - განაცხადა ზელენსკიმ.