ესტონეთი რუსების მიერ საჰაერო სივრცის დარღვევაზე NATO-ს მეოთხე მუხლზე კონსულტაციებს ითხოვს

ესტონეთი რუსული ავიაგამანადგურებლების მიერ საჰაერო სივრცის დარღვევის ფაქტზე NATO-ს მეოთხე მუხლის საფუძველზე კონსულტაციებს ითხოვს.

ამის შესახებ ქვეყნის პრემიერმინისტრი, რისტენ მიხალი სოციალურ ქსელში წერს.

"დღეს დილით, რუსეთის 3-მა გამანადგურებელმა თვითმფრინავმა, MIG-31-მა, ესტონეთის საჰაერო სივრცე დაარღვია.

ნატოს გამანადგურებლებმა საპასუხო რეაგირება მოახდინეს და რუსული თვითმფრინავები უკან გაბრუნდნენ.

საჰაერო სივრცის ასეთი დარღვევა სრულიად მიუღებელია. ესტონეთის მთავრობამ ნატოს მე-4 მუხლით კონსულტაციები მოითხოვა", - წერს მიხაილი.

ეს ნაბიჯი ტალინს საშუალებას მისცემს, აღნიშნული საკითხი ჩრდილოატლანტიკური საბჭოს (NATO-ს მთავარი პოლიტიკური გადაწყვეტილების მიმღები ორგანო) წინაშე წამოჭრას.

ამის შემდეგ კი იმართება კონსულტაციები, რათა დადგინდეს, დაემუქრა თუ არა საფრთხე წევრი ქვეყნის ტერიტორიულ მთლიანობას, პოლიტიკურ დამოუკიდებლობას ან უსაფრთხოებას.

დღეს 3-მა რუსულმა ავიაგამანადგურებელმა ესტონეთის საჰაერო სივრცე დაარღვია. მათ დედაქალაქ ტალინის მახლობლად, დაახლოებით, 12 წუთი დაჰყვეს.