ტვ პირველის თანამშრომლებისთვის პროფესიულ საქმიანობაში ხელის შეშლის ფაქტზე გამოძიება დაიწყო

სპეციალური საგამოძიებო სამსახურის ინფორმაციით, ტვ პირველის თანამშრომლებისთვის პროფესიულ საქმიანობაში უკანონოდ ხელის შეშლის ფაქტზე გამოძიება დაიწყო.

"სპეციალურმა საგამოძიებო სამსახურმა, 2024 წლის 6 იანვარს, მედიასაშუალებით გავრცელებული სიუჟეტის საფუძველზე, ტელეკომპანია ტვ პირველის თანამშრომლებისთვის პროფესიულ საქმიანობაში უკანონოდ ხელის შეშლის ფაქტზე, სისხლის სამართლის კოდექსის 154-ე მუხლის პირველი ნაწილით გათვალისწინებული დანაშაულის ნიშნებით გამოძიება დაიწყო", - წერია განცხადებაში.

საუბარია შემთხვევაზე, როდესაც ტელეკომპანიის ცნობით, მის გადამღებ ჯგუფს ბულაჩაურის სოფლის მიმდებარე ტერიტორიაზე არსებული ავტოსადგომის დაცვის თანამშრომელმა უფლება არ მისცა, თბილისისთვის განკუთვნილი ახალი 18-მეტრიანი ავტობუსები გადაეღო.