შსს-ს მტკიცებით, მიმდინარე აქცია შეკრების და მანიფესტაციის კანონით დადგენილ ნორმებს გასცდა

შინაგან საქმეთა სამინისტროს მტკიცებით, რუსთაველის გამზირზე, პარლამენტის მიმდებარე ტერიტორიაზე მიმდინარე აქცია გასცდა შეკრებისა და მანიფესტაციის კანონით დადგენილ ნორმებს.

ამასთან, უწყება აღნიშნავს, რომ პოლიციელებმა სიტუაციის განმუხტვის მიზნით კანონით დადგენილი სპეციალური საშუალებები გამოიყენეს.

"მიუხედავად, ადგილზე მართლწესრიგის დაცვის მიზნით მობილიზებული სამართალდამცველების მხრიდან აქციის მონაწილეების მიმართ გაკეთებული არაერთი მოწოდებისა, ასევე, შინაგან საქმეთა სამინისტროს მიერ ოფიციალურად გავრცელებული განცხადებისა, უკვე რამდენიმე საათია აქციის წევრები სიტყვიერ და ფიზიკურ შეურაცხყოფას აყენებენ პოლიციელებს, ასევე, მათი მიმართულებით ისვრიან სხვადასხვა სახის საგნებს, პიროტექნიკას, შედეგად, დაშავებულია შინაგან საქმეთა სამინისტროს ორი თანამშრომელი.

აქციის მონაწილეები აზიანებენ და ცეცხლს უკიდებენ ინფრასტრუქტურას. აღსანიშნავია, რომ აქციის მონაწილეთა გარკვეულმა ნაწილმა გადაინაცვლა ჭიჭინაძის ქუჩის მიმართულებით, სადაც აღნიშნულმა პირებმა დააზიანეს პარლამენტის შესასვლელი ჭიშკარი", - ვკითხულობთ განცხადებაში.

შსს აქციის მონაწილეებს მოუწოდებს, არ განახორციელონ კანონსაწინააღმდეგო ქმედებები და დაემორჩილონ "სამართალდამცველთა" მითითებებს.