რუბიო: უკრაინის ომში მშვიდობის მიღწევა უახლოეს კვირებში უნდა გადაწყდეს

აშშ-ის სახელმწიფო მდივანმა მარკო რუბიომ განაცხადა, რომ რუსეთ-უკრაინის ომში პროგრესის მიღწევის დრო მოახლოვდა და უახლოეს კვირებში უნდა გაირკვეს, მართლაც სურს თუ არა რუსეთს მშვიდობა. რუბიომ აღნიშნა, რომ, მიუხედავად ცეცხლის შეწყვეტის შეთანხმების მიღწევისა, რუსეთი კვლავ ახორციელებს თავდასხმებს ენერგეტიკულ ობიექტებზე უკრაინაში, რაც "ძალიან ცუდი სიგნალია".

"ეს ომი ჯერ არ დასრულებულა. თუ რუსეთის მხრიდან ფართომასშტაბიანი შეტევა განახლდება, ეს იქნება ნათელი ნიშანი, რომ მათ მშვიდობა არ სურთ. ამ შემთხვევაში ჩვენ ჩვენი პოლიტიკა უნდა სხვაგვარად უნდა ჩამოვაყალიბოთ,“ – თქვა რუბიომ ბრიუსელში გამართულ პრესკონფერენციაზე, NATO-ს შეხვედრის შემდეგ.

მან ასევე აღნიშნა, რომ თავდაპირველად მნიშვნელოვანი იყო მოსკოვთან საუბარი, მაგრამ ახლა დადგა დრო, როცა მხარეებმა კონკრეტული ნაბიჯები უნდა გადადგან. რუბიომ ხაზგასმით თქვა, რომ აშშ არ აპირებს დროის კარგვას "საუბარზე საუბრისთვის" და ახლა სჭირდება რეალური წინსვლა.

მიანმარი და USAID-ის შეზღუდვები

რუბიომ უპასუხა კრიტიკას, რომ აშშ-ს ჰუმანიტარული რეაგირება მიანმარში მომხდარ მიწისძვრაზე ნელა მიმდინარეობს. როგორც აღნიშნა, ამის ერთ-ერთი მიზეზი ქვეყანაში არსებული სამხედრო ხუნტაა, რომელიც არ აძლევს ამერიკელებს თავისუფლად მოქმედების საშუალებას. ამასთან, რუბიომ მკაცრად გააკრიტიკა საერთაშორისო არასამთავრობო ორგანიზაციები და თქვა, რომ "აშშ აღარ დახარჯავს 100 მილიონს იმისთვის, რომ მხოლოდ 10-მა მილიონმა მიაღწიოს ხალხამდე".

ჰუთები და ირანი – აშშ-ის წნეხის პოლიტიკა გრძელდება

შეერთებული შტატები აგრძელებს დარტყმებს ჰუთების წინააღმდეგ წითელ ზღვაში და რუბიოს თქმით, ამით ამერიკა დიდ საქმეს აკეთებს გლობალური ვაჭრობის დასაცავად. მისი თქმით, "აშშ ფაქტობრივად მარტო აკეთებს ამ საქმეს, თუმცა ყველა ქვეყანას სურს თავისუფლად გადაადგილდეს ამ გზით".

რაც შეეხება ირანს, რუბიომ აღნიშნა, რომ არც ერთ ქვეყანას არ სურს ირანი ბირთვული იარაღის მფლობელად იხილოს, ხოლო პრეზიდენტ ტრამპს გადაწყვეტილი აქვს – ირანს ბირთვული იარაღი "მისი მმართველობისას არ ექნება".