პოლონეთმა საბრძოლო ავიაცია აამოქმედა უკრაინაზე რუსეთის მასირებული იერიშის გამო

7 სექტემბრის ღამეს, რუსეთის მასირებული თავდასხმის ფონზე, პოლონეთში საბრძოლო ავიაცია საჰაერო სივრცეში ავიდა, ხოლო საჰაერო თავდაცვისა და რადარების სისტემები მაღალ მზადყოფნაში გადაიყვანეს. ამის შესახებ ინფორმაცია პოლონეთის შეიარაღებული ძალების საოპერაციო სარდლობამ გაავრცელა.

სარდლობის ცნობით, პოლონეთისა და მოკავშირე ქვეყნების გამანადგურებელი თვითმფრინავები მოქმედებდნენ ქვეყნის საჰაერო სივრცეში. მოგვიანებით უწყებამ განაცხადა, რომ ოპერაციები დასრულდა მას შემდეგ, რაც რუსეთმა შეწყვიტა იერიშები უკრაინაზე. პოლონეთის საჰაერო სივრცის უსაფრთხოების უზრუნველყოფაში ნიდერლანდების სამეფო საჰაერო ძალების F-35 თვითმფრინავებიც მონაწილეობდნენ.

რუსეთმა ღამით უკრაინის წინააღმდეგ მასირებული კომბინირებული შეტევა განახორციელა - გამოყენებულ იქნა როგორც რაკეტები, ასევე საბრძოლო დრონები. უკრაინის საჰაერო თავდაცვის ძალებმა 823 სამიზნიდან 751 გაანეიტრალეს, თუმცა 9 რაკეტა და 54 დრონი 33 ობიექტს მოხვდა.

კიევი დრონებითა და რაკეტებით დაიბომბა. დილის 7 საათის მდგომარეობით, დაღუპულია 3 და დაშავებულია 11 ადამიანი. იერიშის შედეგად ასევე გაჩნდა ხანძარი უკრაინის მინისტრთა კაბინეტის შენობაში.