ივანიშვილი, ღარიბაშვილი და კობახიძე მანდატებს ტოვებენ

ქართული ოცნების ერთ-ერთი ლიდერის მამუკა მდინარაძის ინფორმაციით, ბიძინა ივანიშვილი, ირაკლი კობახიძე და ირაკლი ღარიბაშვილი საპარლამენტო მანდატებს ტოვებენ.

მისი თქმით, ისინი სიაში ფორმალურად იყვნენ.

"ეს ადამიანები, როგორც ჩემთვის ცნობილია და ეს არ არის დასამალი, ბატონი ბიძინაც, ბატონი ირაკლიც, ბატონი ირაკლიც, ეს ადამიანები პარლამენტში დარჩენას არ აპირებენ, ისინი არიან წარმომადგენლები ჩვენი პარტიის, ხელმძღვანელები და ისინი საპარლამენტო სიაში იყვნენ, როგორც ეს წესია, რიგია, ფორმალურად, რეალურად და ისინი ტოვებენ საპარლამენტო მანდატებს. ძალიან მალე [დატოვებენ]" - თქვა მდინარაძენ.

დღეს, 25 ნოემბერს ქართულმა ოცნებამ პარლამენტში თავისი უფლებამოსილება ცნო. კენჭისყრაში მონაწილეობა ოცნების 88 წევრმა მიიღო და მხარი ყველამ დაუჭირა.

მათ უფლებამოსილება ცნეს 150-ვე დეპუტატის, მათ შორის ბარიერგადალახული ოპოზიციური პარტიების, რომლებიც პარლამენტში შესვლას არ აპირებენ.