"დღეს დაგეგმილი ყველა საკლუბო ღამე გაუქმდება" - თბილისის ღამის კლუბების საერთო განცხადება

თბილისის ღამის კლუბები განცხადებას ავრცელებენ და აღნიშავენ, რომ საერთო გადაწყვეტილებით დღეს დაგეგმილი საკლუბო ღამეები გაუქმდება, ხოლო მათი სურვილია, საცეკვაო მოედანზე დაგროვებულმა ენერგიამ ქუჩებში გადაინაცვლოს.

ამასთან, განცხადებაში ვკითხულობთ, რომ კლუბები სისტემის ყველა მსხვერპლსა და მძევალს სოლიდარობას უცხადებენ და მოითხოვენ, დაუყონებლივ გათავისუფლდნენ აქციაზე დაკავებული დემონსტრანტები, რომლებიც უკომპრომისოდ იბრძვიან რუსული ავტორიტარული რეჟიმის წინააღმდეგ.

გთავაზობთ განცხადების სრულ ვერსიას, რომლის ავტორები ღამის კლუბები: BASSIANI, KHIDI, LEFT BANK, MTKVARZE, TBILI ORGIA და TES არიან.

თბილისის საკლუბო სცენა არასდროს დამორჩილებია და არც ახლა აპირებს დაემორჩილოს არალეგიტიმური ხელისუფლების მანკიერ მცდელობებს, გაანადგუროს ჩვენი საზოგადოების საერთო მონაპოვარი. ულტრა-მემარჯვენე პოპულიზმის აღზევება, 2024 წელს მიღებული რუსული და ანტი-ლგბტქ+ კანონები სწორედ ამ მონაპოვრის განადგურების მცდელობაა.

მიმდინარე ბრძოლაში თითოეული ჩვენგანის ჩართულობა და მონაწილეობა გადამწყვეტია. სწორედ ამიტომ, თბილისის საკლუბო სცენა ერთსულოვნად შეთანხმდა, გაუქმდეს დღეს დაგეგმილი საკლუბო ღამეები, საცეკვაო მოედანზე დაგროვებულმა ენერგიამ კი ქუჩებში გადაინაცვლოს.

სოლიდარობას ვუცხადებთ სისტემის ყველა მსხვერპლს და მძევალს, ყველა შეუპოვარ და დაუმორჩილებელ ხმას და მოვითხოვთ აქციაზე დაკავებული დემონსტრანტების დაუყოვნებლივ გათავისუფლებას, რომლებიც უკომპრომისოდ იბრძვიან რუსული ავტორიტარული რეჟიმის წინააღმდეგ. მოვუწოდებთ ქვეყნის თითოეულ მოქალაქეს, უპირობოდ შეუერთდეს დაუმორჩილებლობის საყოველთაო დემონსტრაციებს საქართველოს ყველა ქალაქში", - აღნიშნულია საერთო განცხადებაში.

მოქალაქეები, რომლებიც მთავრობის გადაწყვეტილებას აპროტესტებენ, პარლამენტის შენობასთან იკრიბებიან. აქციის მონაწილეებს ამ დროისთვის რუსთაველის გამზირი გადაკეტილი აქვთ.