აშშ-მა რუსეთს კიბერდანაშაულების და ფულის გათეთრების გამო ახალი სანქციები დაუწესა

ამერიკის შეერთებულმა შტატებმა რუსული ვირტუალური ფინანსური პლატფორმების წინააღმდეგ სანქციები დააწესა. ასევე ე.წ. შავ სიაში მოხვდნენ რუსეთის მოქალაქეები, რომლებიც კიბერდანაშაულთან და ფულის გათეთრებასთან არიან კავშირში. ინფორმაციას აშშ-ის სახაზინო დეპარტამენტი ავრცელებს.

"დღეს აშშ-ის სახაზინო დეპარტამენტი იღებს ზომებს, როგორც კოორდინირებული საერთაშორისო ძალისხმევის ნაწილი, რათა რუსული კიბერდანაშაულის სერვისები შეაჩეროს", - ნათქვამია განცხადებაში.

კერძოდ, ფინანსური დანაშაულების აღსრულების ქსელი (FinCEN) აწესებს შეზღუდვებს რუსული ვირტუალური ვალუტის PM2BTC-ის მიმართ, რომელიც რუსეთში ფულის გათეთრებაშია ჩართული. გარდა ამისა, საგარეო აქტივების კონტროლის ოფისი (OFAC) აწესებს სანქციებს რუსეთის მოქალაქე სერგეი ივანოვის წინააღმდეგ, რომელიც ფულის გათეთრებაში მნიშვნელოვან როლს თამაშობს, ასევე სანქციები უწესდება სენტ-ვინსენტსა და გრენადინებში რეგისტრირებული ვირტუალური ვალუტის გადამცვლელ Cryptex-ის წინააღმდეგ. ასევე განცხადების თანახმად, აშშ-ის სახელმწიფო დეპარტამენტმა ივანოვის დაპატიმრებისთვის საჭირო ინფორმაციის სანაცვლოდ 10 მილიონ დოლარამდე ჯილდო დააწესა.

ამასთან, ნათქვამია, რომ FinCEN-ისა და OFAC-ის სანქციები კოორდინირებულია აშშ-ს სხვა სამთავრობო უწყებებისა და საერთაშორისო პარტნიორების ქმედებებთან.