ზურაბიშვილი: პატივი იყო ტრამპის ინაუგურაციაზე დასწრება და ქართველი ხალხის წარდგენა

პრეზიდენტი სალომე ზურაბიშვილი დონალდ ტრამპს აშშ-ის პრეზიდენტობის ახალი ვადის დაწყებას X-ზეც ულოცავს და აღნიშნავს, რომ მის ინაუგურაციაზე დასწრება და ქართველი ხალხის წარდგენა მისთვის პატივი იყო.

"ვულოცავ დონალდ ტრამპს პრეზიდენტობის ახალი ვადის დაწყებას. პატივი იყო მის ინაუგურაციაზე დასწრება და ქართველი ხალხის წარდგენა, რომელსაც გადაწყვეტილი აქვს, აშშ-სთან სტრატეგიული პარტნიორობა დაიბრუნოს", - წერს ზურაბიშვილი.

ამასთან, საქართველოს მე-5 პრეზიდენტი მარკო რუბიოს აშშ-ის სახელმწიფო მდივნის თანამდებობაზე დამტკიცებას ულოცავს.

"მარკო რუბიო, გილოცავთ თანამდებობაზე დამტკიცებას. საქართველოს რეგიონში სტაბილურობის, მშვიდობისა და დემოკრატიის სასარგებლოდ თქვენი ჩართულობის იმედი აქვს. რუსეთისა და ჩინეთის ინტერესებს რეგიონში წინააღმდეგობა უნდა გაეწიოს", - აღნიშნავს ზურაბიშვილი.

***

აშშ-ის არჩეულმა პრეზიდენტმა დონალდ ტრამპმა საპრეზიდენტო ფიცი დადო. ის აშშ-ის 47-ე პრეზიდენტი ოფიციალურად გახდა.

დონალდ ტრამპმა ფიცი აშშ-ის უზენაესი სასამართლოს მთავარი მოსამართლის ჯონ რობერტსის წინაშე დადო.

"მე, დონალდ ტრამპი, საზეიმოდ ვფიცავ, რომ ერთგულად აღვასრულებ შეერთებული შტატების პრეზიდენტის მოვალეობას და ძალას არ დავიშურებ იმისათვის, რომ შესაძლებლობების ფარგლებში დავიცვა და აღვასრულო აშშ-ის კონსტიტუცია", - თქვა დონალდ ტრამპმა ფიცის დადების დროს.

ფიცის დადების ცერემონია უამინდობის გამო კაპიტოლიუმის შენობაში გაიმართა. კაპიტოლიუმის შენობაში ფიცის დადების ცერემონია ბოლოს 1985 წელს რონალდ რეიგანის ინაუგურაციის დროს ჩატარდა.

კაპიტოლიუმის შენობაში დონალდ ტრამპის ინაუგურაციას 2 600-მდე ადამიანი დაესწრო.

დონალდ ტრამპამდე ფიცი ასევე დადო ვიცე-პრეზიდენტმა ჯეი დი ვენსმა. ის აშშ-ის 50-ე ვიცე-პრეზიდენტი იქნება.