ზელენსკი: უკრაინის დროშა არის მიზანი და ოცნება ოკუპირებულ ტერიტორიებზე მცხოვრები ადამიანებისთვის
უკრაინის პრეზიდენტმა ვოლოდიმირ ზელენსკიმ სახელმწიფო დროშის დღეს გამართულ ცერემონიაზე განაცხადა, რომ ლურჯ-ყვითელი დროშა ოკუპირებულ ტერიტორიებზე მცხოვრები ადამიანებისთვის მიზანსა და ოცნებას წარმოადგენს.
„ეს დროშა არის მიზანი და ოცნება ბევრი ჩვენიანი ადამიანისთვის დროებით ოკუპირებულ ტერიტორიებზე. ისინი მას უფრთხილდებიან, რადგან იციან - ჩვენ ჩვენს მიწას ოკუპანტს არ ვაჩუქებთ,“ – თქვა ზელენსკიმ.
მისი თქმით, უკრაინა აერთიანებს საუკეთესოებს და დაამტკიცა, რომ მხოლოდ მასთან ერთად შეიძლება დემოკრატიული ერებისთვის უსაფრთხოების გარანტიის მიღწევა.
„ყველას, ვინც თავისი წვლილი შეიტანა უკრაინის სიმბოლოს გაძლიერებაში, დღეს მადლობას ვუხდი - ეს სრულიად დამსახურებულია,“ - განაცხადა პრეზიდენტმა.
