ზელენსკი: ყველაზე მძიმე მდგომარეობა ბახმუტში რჩება, მაგრამ მტერი ქალაქს არ აკონტროლებს

უკრაინის პრეზიდენტის, ვოლოდიმირ ზელენსკის განცხადებით, ყველაზე მძიმე მდგომარეობა დონეცკის ოლქის ქალაქ ბახმუტში რჩება, მაგრამ მტერი ქალაქს არ აკონტროლებს.

"ყველაზე რთული ვითარება ჩვენი სახელმწიფოს ტერიტორიაზე, არის ზუსტად იქ [ბახმუტში]. სწორედ იქ იყენებენ იარაღს ყველაზე დიდი რაოდენობით. ძალიან, ძალიან რთული ამბავია.

ბახმუტის ზოგიერთ ნაწილში წარმატება გვაქვს - წინ მივდივართ, შემდეგ არა, ისევ ვიხევთ უკან პოზიციებზე. ეს ხდება ყოველდღიურად, მაგრამ ჩვენ ბახმუტში ვართ და მტერი ბახმუტს არ აკონტროლებს. ეს არის დღევანდელი მდგომარეობა", - თქვა უკრაინის პრეზიდენტმა.

ზელენსკის თქმით, ბახმუტში ვითარებას უკრაინის სახმელეთო ჯარების მეთაური, გენერალ-პოლკოვნიკი ოლექსანდრ სირსკი აკონტროლებს. ამასთან, ის აღნიშნავს, რომ სირსკისთვის მთავარი სამხედრო პერსონალის შენარჩუნებაა.

დონეცკის ოლქის ქალაქი ბახმუტი კვლავ ერთ-ერთ ყველაზე ცხელ ზონად რჩება. ამასთან, ბახმუტის გარდა, საბრძოლო მოქმედებების ეპიცენტრში მარინკაც იმყოფება. ყოველდღიურად, უკრაინის თავდაცვის ძალები ამ ტერიტორიაზე მტრის ათეულობით თავდასხმას იგერიებენ.