"სიძულვილის ენის თავიდან აცილება აუცილებელია" - ომბუდსმენი და ცესკო საარჩევნო გარემოზე

სახალხო დამცველი, ლევან იოსელიანი და ცენტრალური საარჩევნო კომისია "დისკრიმინაციისა სიძულვილის ენისგან თავისუფალი საარჩევნო გარემოს უზრუნველსაყოფად" ერთობლივ განცხადებას ავრცელებენ.

განცხადებაში აღნიშნულია, რომ ქვეყანაში წელს პირველად საპარლამენტო არჩევნები სრულად პროპორციული სისტემით ტარდება. წლევანდელი არჩევნები კი ასევე მნიშვნელოვანია იმ კუთხით, რომ პირველად საქართველოს ისტორიაში, ის ელექტრონული საშუალებებით ჩატარდება, რომლის გამოყენებასაც ამომრჩეველთა თითქმის 90% შეძლებს.

მათი თქმით, არჩევნების თავისუფალ, სამართლიან და მშვიდობიან გარემოში ჩატარებას განსაკუთრებული მნიშვნელობა აქვს ქვეყნის დემოკრატიული განვითარებისა და ევროპული ინტეგრაციისთვის, ამიტომ მოუწოდებენ პოლიტიკური პროცესებში ჩართულ მხარეებს, ხელი შეუწყონ საარჩევნო გარემოს ფორმირებას.

"ამდენად, გასული წლების არჩევნების უკიდურესად პოლარიზებული წინასაარჩევნო პერიოდის, ასევე არსებული გარემოს კიდევ უფრო მეტად პოლარიზების საფრთხის გათვალისწინებით, საქართველოს სახალხო დამცველსა და ცენტრალურ საარჩევნო კომისიას, ერთობლივად როგორც ორ დამოუკიდებელ კონსტიტუციურ ინსტიტუტს, სურს მოუწოდოს პოლიტიკურ და წინასაარჩევნო პროცესებში ჩართულ ყველა მხარეს ხელი შეუწყონ სათანადო საარჩევნო გარემოს ფორმირებას.

საარჩევნო მთლიანობა და ჯანსაღი საარჩევნო გარემო ფუნდამენტურია დემოკრატიული საზოგადოების ფუნქციონირებისთვის. თუმცა, როდესაც საარჩევნო პროცესს თან სდევს სიძულვილის ენის გამოყენება და ამ პროცესში ჩართული პირების მიმართ პირადი თავდასხმები, ეს პირდაპირ ასუსტებს საარჩევნო გარემოს", - აცხადებენ ისინი.

განცხადების თანახმად, საარჩევნო პერდიოდში, აქტიურად შეინიშნება საარჩევნო სუბიექტების სხვადასხვა ნიშნის მიხედვით ადამიანთა დისკრიმინაციის წახალისება და სიძულვილის ენის გამოყენება. ნათქვამია, რომ გასულ წლებში ასეთი თავდასხმის ობიექტები საარჩევნო კომისიების წარმომადგენლები და წევრებიც არა ერთხელ გამხდარან.

"ამასთანავე, პოლიტიკური დებატები მონაწილეთა მხრიდან ერთმანეთის მისამართით შეურაცხმყოფელი განცხადებებით ხასიათდება. განსაკუთრებით თვალსაჩინოა პოლიტიკურ ცხოვრებაში ჩართული ქალების მიმართ სექსისტური დამოკიდებულება, რაც, ხშირ შემთხვევაში, მათ მიმართ პოლიტიკური ბრძოლის იარაღად გამოიყენება. სახალხო დამცველი და ცენტრალური საარჩევნო კომისია ხაზგასმით აღნიშნავენ, რომ ასეთი ფაქტები საზიანოა და ხელს უშლის თანასწორი და მშვიდობიანი საარჩევნო გარემოს ჩამოყალიბებას.

ამასთან, საარჩევნო ადმინისტრაციის გამართულ საქმიანობას, საარჩევნო პროცესების შეუფერხებლად წარმართვასთან ერთად ამ პროცესებისადმი მაღალი საზოგადოებრივი ნდობის ფორმირებაში ერთ-ერთი გადამწყვეტი მნიშვნელობა ენიჭება, რაც თავის მხრივ, უკიდურესად აუცილებელია ქვეყნის დემოკრატიული განვითარებისათვის. ელექტრონული ტექნოლოგიების მასშტაბური დანერგვის, ასევე, ზოგადად საარჩევნო ადმინისტრაციის შეუცვლელი როლის გათვალისწინებით, ყველა მხარის ხელშეწყობით საარჩევნო ადმინისტრაციას შესაძლებლობა უნდა მიეცეს სიძულვილის ენისგან თავისუფალ და მშვიდობიან გარემოში სრულყოფილად შეასრულოს მასზე დაკისრებული მოვალეობები", - ვკითხულობთ განცხადებაში.

სახალხო დამცველისა და ცესკოს განცხადებით, აუცილებელია პარტიების ლიდერებმა/წარმომადგენლებმა, შესაბამისმა კანდიდატებმა და მათმა მხარდამჭერებმა, პოლიტიკური თანამდებობის პირებმა, მაღალი პოლიტიკური და სამოქალაქო პასუხისმგებლობა გამოიჩინონ და ხელი შეუწყონ პლურალისტური, ძალადობისა და სიძულვილის ენისგან თავისუფალი საარჩევნო კამპანიის წარმართვას. ასევე, საუბრობენ იმაზე, რომ დემოკრატიულ ღირებულებებზე ორიენტირებული პოლიტიკური კულტურის დასანერგად, მნიშვნელოვანია კანდიდატთა საარჩევნო კამპანიები მიმართული იყოს საქმიანი, საარჩევნო პროგრამებზე ორიენტირებული დისკუსიისკენ.

"ამავდროულად, აღსანიშნავია მედიის განსაკუთრებული როლი წინასაარჩევნო კამპანიის თავისუფლად და სამართლიანად წარმართვის კონტროლის თვალსაზრისით. მნიშვნელოვანი იქნება მედიის წარმომადგენლებმა, საარჩევნო კამპანიების გაშუქებისას, სიძულვილის ენის გამოყენების შემთხვევებზე მოახდინონ შესაბამისი განმარტება და მსგავს ფაქტებს კრიტიკულად გამოეხმაურონ.

დასასრულს, სიძულვილის ენის თავიდან აცილება აუცილებელია საარჩევნო მთლიანობის უზრუნველსაყოფად და ჯანსაღი საარჩევნო გარემოს შესანარჩუნებლად. აღნიშნული კი თავის მხრივ არის სამართლიანობის, ფართო მონაწილეობისა და კონსტრუქციული პოლიტიკური დისკუსიის წარმართვის და ადამიანის უფლებების დაცვის გარანტი", - ვკითხულობთ განცხადებაში.