სასამართლომ ტრამპის ადმინისტრაციას უცხოური დახმარების გაყინვა აუკრძალა

აშშ-ის უზენაესმა სასამართლომ ოთხშაბათს 5-4 გადაწყვეტილებით უარყო ტრამპის ადმინისტრაციის მოთხოვნა, შეენარჩუნებინა კონგრესის მიერ დამტკიცებული მილიარდობით დოლარის უცხოური დახმარების გაყინვა.

თუმცა, სასამართლომ არ დააზუსტა, როდის უნდა გამოიყოს ეს თანხები, რაც თეთრ სახლს საშუალებას აძლევს, ქვედა ინსტანციებში განაგრძოს საკითხის განხილვა.

გადაწყვეტილებას ხელს არ აწერს კონკრეტული მოსამართლე, თუმცა ოთხმა კონსერვატორმა მოსამართლემ – სამუელ ალიტომ, კლარენს თომასმა, ნილ გორსაჩმა და ბრეტ კავანომ – განსხვავებული მოსაზრება გამოთქვა. უმრავლესობაში აღმოჩნდნენ უზენაესი სასამართლოს თავმჯდომარე ჯონ რობერტსი, ემი კონი ბარეტი, ელენა კაგანი, სონია სოტომაიორი და კეტანჯი ბრაუნ ჯექსონი.

უმრავლესობის აზრით, ვინაიდან ქვედა ინსტანციის სასამართლოს მიერ დაწესებული ვადა უკვე ამოიწურა, სასამართლომ უნდა განმარტოს, რა ვალდებულებები აქვს მთავრობას დროებითი შეზღუდვის გასამართლებლად.

სხვადასხვა ორგანიზაცია, რომლებიც დაფინანსებას გლობალური ჯანდაცვისა და სხვა პროგრამებისთვის იყენებენ, ადმინისტრაციის გადაწყვეტილებას კატასტროფულად აფასებენ. მათ სასამართლოში განაცხადეს, რომ ეს დაფინანსება ხელს უწყობს აშშ-ის ინტერესების დაცვას საზღვარგარეთ და მრავალი ადამიანის სიცოცხლის გადარჩენას.

ტრამპის ადმინისტრაციამ სასწრაფო საჩივარი უზენაეს სასამართლოში შეიტანა, რათა ქვედა ინსტანციის სასამართლოს მიერ დაწესებული ვადის გადავადება მოეთხოვა.