სასამართლომ გიჩო მარგველაშვილსა და კობა პაიჭაძეს პატიმრობა შეუფარდა
სასამართლომ გიჩო მარგველაშვილი და კობა პაიჭაძე პატიმრობაში დატოვა. სასამართლომ დაცვის მხარის შუამდგომლობა გირაოს გამოყენების შესახებ არ დააკმაყოფილა. პროცესზე სიტყვის უფლებით ისარგებლეს ბრალდებულებმა.
გიჩო მარგველაშვილის თქმით, ავტომობილიდან ამოღებული იარაღი მას არ ეკუთვნის და არც მის შესახებ ჰქონია რამე ინფორმაცია. რაც შეეხება კობა პაიჭაძეს, ის აცხადებს, რომ მანქანაში აღმოჩენილი იარაღი მისია. ასევე, ამბობს, რომ მჭიდი ვაზნებთან ერთად კოჯრის ტყეში იპოვა და სახლში ინახავდა.
"შემხებლობა მარგველაშვილს იარაღთან არანაირი არ ჰქონია, არ აქვს და გამოძიების შემდეგ ეტაპზე შესაბამისი მტკიცებულებების დადების შემდეგ, როგორიც არის სათანადო ექსპერტიზები, ეს ცალსახად დადასტურდება. ამ ეტაპზე, დაცვის პოზიციიდან გამომდინარე, ცალსახად ვაცხადებ, რომ მისი დაკავების ფაქტობრივი საფუძველი არ არსებობდა", - ამბობს ადვოკატი მარიკა ფხალაძე.
პროკურორის, ირაკლი ყვავაძის განცხადებით, საქმეში არაერთი მტკიცებულება არსებობს, მათ შორის, პატრულ-ინსპექტორის ჩვენებები, ასევე, ავტომანქანის ჩხრეკის ოქმი, საიდანაც ნივთმტკიცებები ამოიღეს.
"ბრალდებულებს ბრალად ედებათ ცეცხლსასროლი იარაღის უკანონო შენახვა-შეძენა-ტარება ჯგუფურად. დანაშაული გათვალისწინებული სისხლის სამართლის კოდექსის 236-ე მუხლის მე-6 ნაწილის ა ქვეპუნქტით, შესაბამისად, სასჯელის სახედ და ზომად ითვალისწინებს თავისუფლების აღკვეთას 8-დან 11 წლამდე. მოგეხსენებათ, სასამართლომ დააკმაყოფილა ბრალდების მხარის შუამდგომლობა და ორივე მათგანს შეუფარდა პატიმრობა", - თქვა მან.
***
2023 წლის მაისში გოგებაშვილის ქუჩაზე ბიზნესმენის მკვლელობა სცადეს - მისი მიმართულებით საბა გახოკიძემ ისროლა, თუმცა მარგველაშვილის დაცვის წევრმა მოიგერია და თავდამსხმელი ადგილზე მოკლა.
შაბათის ფორმულამ დაადგინა, რომ გიჩო მარგველაშვილი დაცვის გარეშე გადაადგილდებოდა და თავდასხმის მომენტში მის გვერდით მისი ბიძაშვილის პირადი დაცვის თანამშრომელი - კახაბერ კამლაძე იყო.
სროლის ერთ-ერთ მთავარ მოტივად წარსულში გახოკიასა და მარგველაშვილის ფიზიკური დაპირისპირება სახელდება, რა დროსაც გიჩო მარგველაშვილმა საბა გახოკია მძიმედ დაჭრა.
დაპირისპირების მთავარი ფიგურანტები ერთ სკოლაში სწავლობდნენ და ერთ უბანში ცხოვრობდნენ. თუმცა, საბა გახოკია გარკვეული წლების განმავლობაში, საქართველოში არ იმყოფებოდა და სავარაუდოდ ერთმანეთს დიდი ხნის განმავლობაში აღარ შეხვედრიან. მარგველაშვილსა და გახოკიას შორის, წარსულში მომხდარი დაპირისპირების დეტალები კარგად ახსოვთ მათ სკოლელებს და მეზობლებს, მაგრამ ამ თემაზე ღიად დღეს აღარავინ საუბრობს.
შაბათის ფორმულას ინფორმაციით, გოგებაშვილის ქუჩაზე განვითარებული მოვლენების უკან, გამოძიება ეძებს შესაძლო ბიზნეს ინტერესებსა და დიდი ფულის გამო დაწყებული დაპირისპირების კვალსაც.
