საპატრიარქოს თქმით, ინტერნეტიდან გაიგეს, რომ მეუფე ნიკოლოზი მოსკოვში მსახურებას ესწრებოდა
საქართველოს საპატრიარქოს მტკიცებით, ინტერნეტიდან გაიგეს, რომ მეუფე ნიკოლოზი წმ. კირილესა და მეთოდეს ხსენების დღეს მოსკოვში ლიტურგიას დაესწრო.
მათი თქმით, ეს არ ყოფილა მიტროპოლიტ ნიკოლოზის ოფიციალური ვიზიტი.
"მედიასა და ინტერნეტსივრცეში გავრცელდა ინფორმაცია, რომლის მიხედვით, თითქოს ახალქალაქის, კუმურდოსა და კარის მიტროპოლიტი ნიკოლოზი (ფაჩუაშვილი) მოსკოვში რუსეთის პატრიარქ კირილეს ანგელოზის დღის მისალოცად საქართველოს საპატრიარქომ გაგზავნა.
აღნიშნულთან დაკავშირებით განვმარტავთ:
საქართველოს საპატრიარქოს არ ჰქონდა ინფორმაცია იმის შესახებ, რომ მიტროპოლიტი ნიკოლოზი ამ დღეს ღვთისმსახურებას ესწრებოდა, ვიდრე ინტერნეტში არ გავრცელდა შესაბამისი ფაქტის ამსახველი ფოტომასალა.
გარდა ამისა, გარკვევით აღვნიშნავთ, რომ ეს არ ყოფილა მიტროპოლიტ ნიკოლოზის ოფიციალური ვიზიტი. უკანასკნელ პერიოდში იგი არაერთხელ სწვევია მოსკოვს კერძო და პირადი საჭიროებიდან გამომდინარე, რადგან მას რუსეთის დედაქალაქში ჰყავს ოჯახის წევრები და სხვა ახლობლები", - ნათქვამია განცხადებაში.
ახალქალაქის, კუმურდოსა და კარის მიტროპოლიტი ნიკოლოზი მოსკოვში წმ. კირილესა და მეთოდეს ხსენების დღეს რუსეთში იმყოფებოდა. 24 მაისს მოსკოვის მაცხოვრის ტაძარში რუსეთის პატრიარქმა კირილემ საღმრთო ლიტურგია აღავლინა. ამ დღეს ასევე აღნიშნავენ სლავური დამწერლობისა და კულტურის, ასევე, პატრიარქი კირილეს სახელობის დღეს.
