რუსეთმა იულია ნავალნაიას დაუსწრებლად პატიმრობა შეუფარდა და მასზე ძებნა გამოაცხადა

მოსკოვის ბასმანის სასამართლომ დაუსწრებლად შეუფარდა პატიმრობა დაღუპული რუსი ოპოზიციონერი პოლიტიკოსის ალექსეი ნავალნის ცოლს და უფლებადამცველი ორგანიზაციის Human Rights Foundation-ის ხელმძღვანელს იულია ნავალნაიას.

სასამართლომ დააკმაყოფილა გამოძიების მოთხოვნა და იულია ნავალნაიას აღკვეთის ღონისძიების სახით წინასწარი 2-თვიანი პატიმრობა შეუფარდა. მას ბრალად ედება "ექსტრემისტულ გაერთიანებაში მონაწილეობა".

მოსკოვის სასამართლოების პრესსამსახურის თანახმად, იულია ნავალნაია ასევე ძებნაში გამოაცხადეს. მისი პატიმრობის ვადის ათვლა რუსეთის ტერიტორიაზე ექსტრადაციის/ქვეყანაში დაკავების მომენტიდან დაიწყება.

ბრალდების თანახმად, ალექსეი ნავალნის ცოლს 6-წლამდე თავისუფლების აღკვეთა ემუქრება.