რაზმაძე საგამოძიებო სამსახურს: გამოძიებასთან როგორ ვითანამშრომლო თუ დაწყებული არაა?

შსს-ს ადამიანის უფლებათა დეპარტამენტის რეგიონული სამმართველოს ხელმძღვანელი გოგა რაზმაძე ეხმაურება სპეციალური საგამოძიებო სამსახურის განცხადებას, რომლითაც უწყება მას თანამშრომლობისკენ მოუწოდებს და აცხადებს, რომ "მისთვის გაუგებარია", როგორ უნდა ითანამშრომლოს გამოძიებასთან, თუ ის დაწყებული არაა.

შსს-ს თანამშრომლის თქმით, სპეციალური საგამოძიებო სამსახური საზოგადოების შეცდომაში შეყვანას ცდილობს.

რაზმაძის თქმით, ის საგამოძიებო სამსახურში პირველივე გამოძახებისას მივიდა და წერილობით დაადასტურა, რომ მზად იყო გამოძიების ფარგლებში უწყებისთვის ინფორმაცია მიეწოდებინა.

რაზმაძე ჰყვება, რომ მას შემდეგ, რაც გამოძიების არდაწყების შესახებ სპეციალური საგამოძიებო სამსახურის გადაწყვეტილება გაასაჩივრა, გამომძიებელი მის ადვოკატებს არ დაკავშირებია.

გოგა რაზმაძის განცხადება:

მინდა გამოვეხმაურო სპეციალური საგამოძიებო სამსახურის სრულიად სამარცხვინო განცხადებას.

პირველი - რომელ "გამოძიებასთან თანამშრომლობაზე" მომიწოდებთ?! სადაა გამოძიება? გამოძიებასთან თანამშრომლობა შეიძლება მაშინ, როცა გამოძიებაა დაწყებული. თუ გამოძიება დაწყებული არაა, გამოძიებასთან როგორ უნდა ვითანამშრომლო ჩემთვის სრულიად გაუგებარია.

მეორე - თქვენი პირველივე გამოძახებისთანავე გამოვცხადდი ჩემი ნებით საგამოძიებო სამსახურში და თქვენს ე.წ გასაუბრების ოქმში, წერილობით დავაფიქსირე რომ მზად ვიყავი გამოძიების ფარგლებში დეტალური ინფორმაციის მოსაწოდებლად. თანამშრომლობის სურვილი რომ არ მქონოდა არც მოგმართავდით და არც მოვიდოდი.

მე თქვენთან უარი განვაცხადე ,,სამართლებრივ’’ აბსურდში მონაწილეობის მიღებაზე, რადგან გამოძიება არ იყო დაწყებული (მოვითხოვე გამოძიების დაუყოვნებლივ დაწყება, რადგან საკმარისზე მეტი ინფორმაცია მოგაწოდეთ ჩემი წერილობითი განცხადებით)

მესამე - მეორედ თქვენგან შემეხმიანა გამომძიებელი მას შემდეგ რაც სპეციალური საგამოძიებო სამსახურის გადაწყვეტილება გამოძიების არდაწყებაზე გავასაჩივრე ამავე სამსახურის უფროსთან და პროკურორთან (სხვათა შორის არც ერთისგან ჯერ პასუხი არ მიმიღია).

კერძოდ, 2023 წლის 9 აგვისტოს მომწერა სპეციალური საგამოძიებო სამსახურის გამომძიებელმა, რომელმაც მთხოვა დაკავშირება. მე მას ავუხსენი მიზეზები, რის გამოც მასთან საუბარს ვერ შევძლებდი და ვთხოვე ჩემს ადვოკატთან დაკავშირება (რომლისთვისაც არ დაურეკავთ).

თუ თქვენ რეალური სამართლებრივი პროცედურები გაინტერესებთ, 2 ადვოკატი მყავს და შეგეძლოთ რომელიმესთვის დაგერეკათ.

მაღალი საჯარო ინტერესის უზრუნველსაყოფად, სტატუსს თან ვურთავ გამომძიებელთან მიმოწერას, რომელმაც ჩემი თხოვნის მიუხედავად, არც კი დაურეკა ადვოკატს (კიდევ მე არ ვთანამშრომლობ გამოძიებასთან თუ თქვენ ჩემთან?

მეოთხე - რა გასაუბრებაზე მესაუბრებით? ჩემთან გასაუბრებაც იმიტომ ხომ არ გინდათ, რომ ეს ე.წ. ,,გასაუბრების ოქმიც“ ისევ გენერალურ ინსპექციაში გადაგზავნოთ, რომლის ‼️უფროსის მოვალეობის შემსრულებელი ამ ეტაპზე თავად დავით მინდიაშვილია.

თქვენ ამ განცხადებებით გინდათ საზოგადოების შეცდომაში შეყვანა და თქვენი უკანონო გადაწყვეტილების გამართლება.

ასევე, მინდა კიდევ ერთხელ საჯაროდ სპეციალური საგამოძიებო სამსახურის უფროსს მივმართო (წერილობით მიმართული მაქვს).

სპეციალური საგამოძიებო სამსახურის გამომძიებლის უარი გამოძიების დაწყების თაობაზე უხეშად არღვევს სისხლის სამართლის საპროცესო კოდექსის იმპერატიულ მოთხოვნებს.

გამოძიების დაწყება არ არის საგამოძიებო ორგანოს დისკრეციული უფლებამოსილება. ჩემს განცხადებაში აღწერილი ფაქტობრივი გარემოებები, სრულ შესაბამისობაშია საქართველოს სისხლის სამართლის კოდექსის სამ მუხლთან:

- სისხლის სამართლის კოდექსის 335-ე მუხლთან, ვინაიდან დავით მინდიაშვილი მუქარით, შანტაჟითა და სხვა უკანონო ქმედებებით მაიძულებდა დამეწერა ახსნა-განმარტება;

- სისხლის სამართლის კოდექსის 333-ე მუხლთან, ვინაიდან დავით მინდიაშვილმა გადაამეტა სამსახურებრივ უფლებამოსილებას, ჩემი პირადი ღირსების შეურაცხყოფის გზით, რამაც ჩემი კანონიერი ინტერესის არსებითი დარღვევა გამოიწვია

სისხლის სამართლის კოდექსის 143 ტერცია მუხლთან, ვინაიდან დავით მინდიაშვილი მამცირებდა მთელი სამი საათის განმავლობაში, ლახავდა ჩემს პატივსა და ღირსებას და მაიძულებდა დამეწერა ახსნა განმარტება, რამაც მე მომაყენა ძლიერი ფსიქიკური ტკივილი.

სპეციალურმა საგამოძიებო სამსახურმა კი ჩემს განცხადებაში მითითებულ გარემოებებში არათუ სამი, ვერც ერთი დანაშაულის ნიშნები ვერ დაინახა.

გამოძიების დაწყებაზე უარის თქმით, თქვენმა სამსახურმა არა მხოლოდ დაარღვია სისხლის სამართლის საპროცესო კოდექსის ის ნორმა, რომელიც გაკისრებთ გამოძიების დაწყებას ავალდებულებს, დიდი ალბათობით მოსპო დავით მინდიაშვილის მიერ ჩადენილი დანაშაულის დამადასტურებელი მტკიცებულებების მოპოვების შესაძლებლობა, ვინაიდან ამ მტკიცებულებებზე უკვე ხელი მიუწვდება სწორედ დანაშაულის ჩამდენ პირს რომელიც არათუ ჩამოშორებულია საქმიანობას, ამ ეტაპზე ‼️გენერალური ინსპექციის უფროსის მოვალეობის შემსრულებელია‼️

ამ საქმეზე გამოძიების დროულად დაწყებას ჰქონდა/აქვს არსებითი მნიშვნელობა.

მაღალია ყველა იმ მტკიცებულების განადგურების საფრთხე, რომელიც დაადასტურებს ჩემს მიმართ დანაშაულის ჩადენის ფაქტს (მაგ. შინაგან საქმეთა სამინისტროს გენერალურ ინსპექციაში არსებული ვიდეო კამარების ჩანაწერები, სადაც ზუსტად იქნება ასახული ჩემი შესვლის და გამოსვლის დრო, სხვა მნიშვნელოვანი მტკიცებულებები).

ჩემთვის გაუგებარია რა გარემოებები შეაფასა სპეციალურმა საგამოძიებო სამსახურმა და დანაშაულის რომელი ნიშანი დააკლდა გამოძიების დასაწყებად.

პასუხი, რომელიც მე მივიღე დაუსაბუთებელია. შეფასების პროცესი კი სრულად აცდენილია სისხლის სამართლის კანონმდებლობას.

საქართველოს კანონი ,,სპეციალური საგამოძიებო სამსახურის შესახებ’’ კანონის მე-4 მუხლი განსაზღვრავს სპეციალური საგამოძიებო სამსახურის საქმიანობის პრინციპებს:

• კანონიერებაა;
• ადამიანის უფლებათა და თავისუფლებათა დაცვაა;
• დამოუკიდებლობაა და პოლიტიკური ნეიტრალიტეტი;
• ობიექტურობაა და მიუკერძოებლობაა;
• პროფესიონალიზმი,
• საიდუმლოებისა და
• კონფიდენციალურობის დაცვა.

‼️სპეციალურმა საგამოძიებოო სამსახურმა დაარღვია ყველა ზემოაღნიშნულლი პრინციპი.

სპეციალური საგამოძიებო სამსახურის უფროსს მოვუწოდებ, კანონით გათვალისწინებული წესით წერილობით მიპასუხოს ჩემს განცხადებაზე და ნუ მიგზავნის კვლავ გაურკვეველ პროცედურებში ჩართვის მიზნით იგივე პირს, რომლის გადაწყვეტილება მასთან გავასაჩივრე.

მე რა თქმა უნდა, ვაგრძელებ ჩემი უფლებების დაცვას კანონმდებლობით. გათვალისწინებული ყველა ეროვნული და საერთაშორისო მექანიზმების გამოყენებით." - წერია რაზმაძის განცხადებაში.

დღეს სპეციალურმა საგამოძიებო სამსხურმა გოგა რაზმაძის საქმის შესახებ განცხადება გამოაქვეყნა და მას მოუწოდა, ითანამშრომლოს გამოძიებასთან.

უწყების თქმით, სპეციალური საგამოძიებო სამსახური მზად არის, დაიცვას გოგა რაზმაძის უფლებები და ინტერესები, "რისთვისაც აუცილებელია მან ითანამშრომლოს გამოძიებასთან და განცხადებაში მოყვანილი გარემოებების ირგვლივ, გამომძიებელთან გასაუბრების გზით, მიაწოდოს დამატებითი ინფორმაცია და გააკეთოს განმარტებები."

სამსახური აცხადებს, რომ კანონიერი საფუძვლის არსებობის შემთხვევაში, მზადაა, ყველა საჭირო პროცესუალური მოქმედება ჩაატაროს.

12 ივლისს შინაგან საქმეთა სამინისტროს ადამიანის უფლებათა დეპარტამენტის რეგიონული სამმართველოს მოქმედმა ხელმძღვანელმა, გოგა რაზმაძემ, Facebook-ზე გამოაქვეყნა საჯარო პოსტი, სადაც ისაუბრა სამინისტროში დისკრიმინაციის და შსს-ს გენერალური ინსპექციის უფროსის მოადგილის მიერ მის მიმართ განხორციელებულ დამამცირებელ, შეურაცხმყოფელ მოპყრობასა და ახსნა-განმარტების მიცემის იძულების ფაქტზე.

რაზმაძის თქმით, სპეციალურმა საგამოძიებო სამსახურმა მისი საქმის გამოძიებაზე უარი თქვა.

გოგა რაზმაძე წერს, რომ 4 ივლისს, საგამოძიებო სამსახურს მიმართა და განცხადებაში აღნიშნა, რომ საქმის გამოძიების დროულად დაწყებას ჰქონდა გადამწყვეტი მნიშვნელობა მტკიცებულებების (მათ შორის, ვიდეოჩანაწერების) განადგურების თავიდან ასაცილებლად.