ქვეყნის მასშტაბით ყველა საარჩევნო უბანი გაიხსნა, დაწყებულია კენჭისყრის პროცედურა
საქართველოს მასშტაბით ყველა საარჩევნო უბანი გაიხსნა. კენჭისყრის პროცედურა 08:00 საათზე დაიწყო და მთელი დღის განმავლობაში გაგრძელდება. საარჩევნო უბნები 20:00 საათზე დაიხურება.
ცენტრალურ საარჩევნო კომისიაში საინფორმაციო ბრიფინგები გაიმართება და ცესკოს პრესსპიკერი საზოგადოებას პერიოდულად კენჭისყრის პროცესის მიმდინარეობის შესახებ ინფორმაციას მიაწვდის.
ცესკო-ს თანახმად, ქვეყნის მასშტაბით 3 061 საარჩევნო უბანია გახსნილი, რომელთაგან 2 284 უბანზე კენჭისყრა ელექტრონული, ხოლო 777 უბანზე ტრადიციული წესით ჩატარდება. ასევე, 10 გამონაკლის შემთხვევაში შექმნილი უბანია, რომელიც პენიტენციურ დაწესებულებებში გაიხსნა.
ცესკო-ს მიხედვით, ამომრჩეველთა საერთო რაოდენობა 3 513 818 ამომრჩეველს შეადგენს - ელექტრონული ტექნოლოგიების გამოყენებით არჩევნებში მონაწილეობას 3 130 348 ამომრჩეველი მიიღებს.
მოსახლეობა 64 მუნიციპალიტეტში ახალ საკრებულოებსა და თვითმმართველი ქალაქისა და თემის მერებს ირჩევს.
თვითმმართველობის არჩევნებს ოპოზიციის ნაწილი ბოიკოტს უცხადებს.
4 ოქტომბრის არჩევნებში შემდეგი პარტიები იღებენ მონაწილეობას:
- მამული, ენა, სარწმუნოება - N1
- კონსერვატორები საქართველოსთვის - N3
- ჩვენი გაერთიანებული საქართველო - N5
- თავისუფალი საქართველო - N7
- საქართველოს პატრიოტთა ალიანსი - N8
- ძლიერი საქართველო - ლელო - N9
- საქართველო - N11
- მწვანეთა პარტია - N12
- სახალხო ხელისუფლება - N14
- გახარია საქართველოსთვის - N25
- გირჩი - N36
- ქართული ოცნება - N41
თვითმმართველობის არჩევნების პარალელურად, რუსთაველის გამზირზე საპროტესტო აქცია გაიმართება. დემონსტრანტები 16:00 საათიდან დაიწყებენ შეკრებას. რამდენიმე ლოკაციიდან პარლამენტამდე მარშები გაიმართება.
პოპულარული სიახლეები
