პრეზიდენტი ევროპელ ლიდერებს ესაუბრა და ივანიშვილისადმი მისი შეთავაზება გააცნო

საქართველოს პრეზიდენტი სალომე ზურაბიშვილი ევროპელ ლიდერებს ესაუბრა და ბიძინა ივანიშვილისადმი მისი შეთავაზება გააცნო.

პრეზიდენტის ადმინისტრაციის ცნობით, ზურაბიშვილი ესაუბრა ევროკავშირის უმაღლეს წარმომადგენელს, კაია კალასს, ჩეხეთის რესპუბლიკის პრეზიდენტს, პეტრ პაველს, შვედეთის სამეფოს პრემიერმინისტრს, ულფ კრისტერსოს, პოლონეთის რესპუბლიკის პრეზიდენტს, ანჯეი დუდას და ლატვიის რესპუბლიკის პრეზიდენტს ედგარს რინკევიჩს.

"საქართველოს პრეზიდენტმა ევროპელ კოლეგებს გააცნო ბიძინა ივანიშვილისადმი მისი შეთავაზება, რაც არის კრიზისიდან ერთადერთი გამოსავალი. შეთავაზება გულისხმობს შეხვედრას ორ მთავარ საკითხზე შესათანხმებლად, რაც არის ახალი არჩევნების თარიღი და ეუთო ოდირის დასკვნის საფუძველზე არჩევნებისთვის ახალი პირობების განსაზღვრა"- ნათქვამია განცხადებაში.

პრეზიდენტი სალომე ზურაბიშვილი ოლიგარქ ივანიშვილს 29 დეკემბრამდე კომპრომისულ დიალოგსა და ახალი არჩევნების თარიღზე შეთანხმებას სთავაზობს. ზურაბიშვილი აცხადებს, რომ ის მზადაა მარტოც შეხვდეს ივანიშვილს. ასევე, პრეზიდენტის თქმით, შეიქმნება საბჭო, რომლის მანდატი ახალი არჩევნების მომზადება იქნება.