ორბელიანის მოედნის მიმდებარედ ტრანსპორტის გადაადგილება დროებით შეიზღუდება

თბილისის მერიის ინფორმაციით, ორბელიანის მოედნის მიმდებარედ, 16 ივნისის 07:00-დან 19 ივნისის 03:00 საათამდე, ტრანსპორტის გადაადგილება შეიზღუდება.

მერიაში ტრანსპორტის გადაადგილების შეზღუდვის მიზეზად თბილისი პიანო ფესტი 2023-ს ასახელებენ.

"სოლიკო ვირსალაძისა და გიორგი ჭანტურიას ქუჩებიდან ათონელის ქუჩის მიმართულებით მოძრავ ავტომობილებს მშრალი ხიდის მიმართულებით გადაადგილება შეეძლებათ იტალიის ქუჩის გავლით, ხოლო მშრალი ხიდიდან ათონელის ქუჩისკენ მიმავალი ტრანსპორტი იმოძრავებს სოლიკო ვირსალაძისა და გიორგი ჭანტურიას ქუჩების გამოყენებით. რაც შეეხება რენა აბჟანდაძის ქუჩას, ტრანსპორტი გადაადგილებას შეძლებს ვახტანგ ორბელიანის ქუჩამდე, რის შემდეგაც გზას მტკვრის ქუჩის მიმართულებით გააგრძელებს", - წერია მერიის განცხადებაში.