ოპოზიციონერი დეპუტატები ხიდაშელისთვის რაჭის მიწების გადაცემის საკითხს იკვლევენ

პარლამენტის ოპოზიციონერი დეპუტატები - თამარ კორძაია, ხათუნა სამნიძე და თეონა აქუბარდია ხელისუფლების მიერ ბიზნესმენ დავით ხიდაშელისთვის რაჭა-ლეჩხუმსა და ქვემო სვანეთში მიწების გადაცემის საკითხს იკვლევენ. ამ მიზნით ისინი რეგიონში იმყოფებოდნენ.

პრესკონფერენციაზე მათ ისაუბრეს, რომ ამ დროისთვის გამოიკვეთა სამი გარემოება. კორძაიას განცხადებით:

• უსაფრთხოების თვალსაზრისით საკითხი არ შესწავლილა;
• არ მომხდარა ადგილობრივი მოსახლეობის ინფორმირება, მათი საკუთრების უფლებების გათვალისწინება ლიცენზიის გაცემისას და დღეს ეს ადამიანები დავობენ სახელმწიფოს წინააღმდეგ, უფრო სწორად, სახელმწიფო ებრძვის ამ ადამიანებს სისხლის სამართლის საქმეებით;
• აბსოლუტურად არ არის გათვალისწინებული გარემოს დაცვითი საკითხები და გარემოს დაცვითი უფლებები.

კორძაიას განცხადებით, სახელმწიფო არ იძლევა ზუსტ კოორდინატებს, სად გადის საზღვარი ხიდაშელის საკუთრებაში არსებული ტერიტორიების.

სახელმწიფომ დავით ხიდაშელს რაჭა-ლეჩხუმსა და ქვემო სვანეთში 104 712 ჰა ტყეზე 49-წლიანი ლიცენზია მარტში მანიჭა - 1 151 832 ლარად.

ტყეები აუქციონზე ისე გავიდა და ლიცენზიაც ისე გაიყიდა, რომ იმ ხალხმა, რომელიც ამ ტყეების სიახლოვეს ცხოვრობს, არაფერი იცოდა. მათ ეს მედიით შეიტყვეს.