მოსამართლე: თუ მივიჩნევთ, რომ პრეზიდენტისგან უნდა მივიღოთ პასუხი, შეიძლება, მოვიწვიოთ

მოსამართლე ევა გოცირიძე ამბობს, რომ სასურველი იქნება, თუ სალომე ზურაბიშვილი იმპიჩმენტის შესახებ წარდგინების არსებით განხილვას დაესწრება. როგორც მან ჟურნალისტებთან განაცხადა, თუ ისეთი საკითხები წამოიჭრება, რომ პრეზიდენტის პოზიციის მოსმენა გახდეს საჭირო, ზურაბიშვილს ხელახლა მოიწვევენ.

"სასურველია, თუ მოვა. არ ვიცი, მოვა თუ არა, ნამდვილად არ შეუტყობინებია ჩემთვის. თუ საკითხები წამოჭრა საქმეში, სადაც ჩავთვლით საჭიროდ, რომ უშუალოდ მისგან უნდა მივიღოთ პასუხი, მაშინ, შეიძლება, ხელახლა მოვიწვიოთ. ყველაფერი გადაწყდება კონსტიტუციის შესაბამისად, აუცილებლად. მაგაში დარწმუნებული ბრძანდებოდეთ", - განაცხადა მან.

საკონსტიტუციო სასამართლოში იმპიჩმენტის წარდგინების განხილვამდე რამდენიმე საათით ადრე პრეზიდენტმა სალომე ზურაბიშვილმა დაწერა, რომ მისი წარმომადგენლები თამარ ჩუგოშვილი და მაია კოპალეიშვილი იქნებიან.

დღეს, 3 ოქტომბერს საქართველოს საკონსტიტუციო სასამართლო პრეზიდენტის იმპიჩმენტის საკითხის წარდგინებას ზეპირი მოსმენით განიხილავს. ჯერჯერობით უცნობია, დაესწრება თუ არა სალომე ზურაბიშვილი განხილვას. არსებითი განხილვა 12:00 საათზე ჩაინიშნა.

საქართველოს საკონსტიტუციო სასამართლოს თავმჯდომარე მერაბ ტურავამ ფორმულასთან 22 სექტემბერს განაცხადა, რომ სხდომა, შესაძლოა, მეორე დღესაც გაგრძელდეს.

საქმეს პლენუმი განიხილავს. სასამართლო პროცესზე როგორც წარდგინების ავტორებს, ისე საქართველოს პრეზიდენტს ელოდება.

პირველ სექტემბერს ცნობილი გახდა, რომ ქართული ოცნება სალომე ზურაბიშვილის წინააღმდეგ იმპიჩმენტის პროცედურას იწყებს. მიზეზად პარტიაში მთავრობის უარის მიუხედავად, პრეზიდენტის ევროპაში გამგზავრება დაასახელეს, რითაც მან "უხეშად დაარღვია კონსტიტუცია".

30 აგვისტოს საქართველოს მთავრობამ პრეზიდენტ სალომე ზურაბიშვილის ევროპაში ვიზიტის პარალელურად განცხადება გამოაქვეყნა და აღნიშნა, რომ მას ყველა მოთხოვნილ ვიზიტზე უარი უთხრეს, მათ შორის, უკრაინაში.