მოქალაქე: ტყე-ტყე ვიარე, ნაკვალევი ვიპოვე... დამიცურდა ფეხი და ჩავვარდი, ძლივს ამოვფოფხდი

ელგუჯა გუტაშვილი, რომელიც გლოლადანაა, იმ დღეს იხსენებს, როდესაც შოვში ღვარცოფი ჩამოწვა. ფორმულასთან ის ყვება, რომ სტიქიის დღეს თბილისში იმყოფებოდა, მეორე დღეს კი რაჭისკენ წავიდა. ის თავისი ბიძაშვილის, გელა გუტაშვილის ოჯახის წევრებს ეძებს.

სოციალურ ქსელებში ვირუსულად გავრცელდა ელგუჯა გუტაშვილის ფოტო, რომელიც სტიქიის მომდევნო დღეებშია გადაღებული.

"თბილისში ვცხოვრობ, ნახალოვკაში. ღამით ძმაკაცები სტუმრად მყავდნენ ბიჭები. შუაღამისას ინტერნეტში ვნახეთ, ასეთი რაღაც ხდებაო, იმათ არ იცოდნენ, რომ აქედან ვიყავი... მეორე დღეს "მარშუტკები" არ მოდიოდნენ, ყველას ეშინოდა. ერთ ტაქსის ვუთხარი არაო, მეორე, მესამე და მეოთხე გავაჩერე და ვუთხარი 200 დოლარს გაძლევ და წამიყვანე-მეთქი. გარისკა და წამოვიდა. ჩამოვედი და ასეთი ამბავი დამხვდა. ამოვედი საღამოსკენ, არ მისული შოვის ხიდთან, მანქანით არ მიგვიშვეს, ფეხით წავედი. ტყე-ტყე ვიარე, ტყის თავს ვეძახით, სათიბია, ერთი ადამიანის ნაკვალევი ვიპოვე, არ ვიცი, ვისი იყო, მეთქი ხომ არავისია... კინაღამ ტყის თავამდე ავედი... იქ რაღაც მეწყერივით იყო, დამიცურდა ფეხი და ჩავვარდი დაბლა, როგორც იქნა ამოვფოფხდი და გადმოვედი და ფეხით ჩამოვედი... გლოლის ბოლოში ვცხოვრობ, ვცხოვრობ რა, ბებიაჩემს და ბაბუაჩემს აქვთ სახლი...

გელა არის ბიძაშვილი, ორი ბავშვი ჰყავს დაკარგული... გელასთან რომ მივედი, რას შვები გუჯა როგორ ხარო... აქეთ მამშვიდებდა", - ამბობს ელგუჯა გუტაშვილი.

3 აგვისტოს, კურორტ შოვში, მათ შორის სასტუმრო სანსეტ შოვთან მეწყერი ჩამოწვა. ადიდებულმა მდინარემ წაიღო სამანქანო ხიდი და კოტეჯები, რომლებშიც დამსვენებლები ცხოვრობდნენ.

მოსახლეობის დასახმარებლად ადგილზე ჩაფრინდა სასაზღვრო პოლიციის 2 სამაშველო ვერტმფრენი. სამაშველო ღონისძიებები ამ დრომდე გრძელდება. სტიქიის ზონიდან, ჯამში 210 ადამიანია გამოყვანილი.

სტიქიის შედეგად 19 ადამიანი დაიღუპა. 10-ზე მეტ ადამიანს ამ დრომდე ეძებენ.