მედია: აშშ უკრაინისა და ისრაელის დახმარების გაერთიანების შესაძლებლობას განიხილავს

გამოცემა The Washington Post-ის ცნობით, აშშ უკრაინისა და ისრაელის დახმარების გაერთიანების შესაძლებლობას განიხილავს.

გავრცელებული ინფორმაციით, თეთრი სახლი ამ თხოვნით კონგრესს მომავალი კვირის დასაწყისში მიმართავს.

აშშ-ის პრეზიდენტის, ჯო ბაიდენის თქმით, ვაშინგტონი მხარს უჭერს ისრაელის უფლებას, დაიცვას საკუთარი მოსახლეობა. ამასთან, ბაიდენი აღნიშნავს, რომ ტერორისტულ თავდასხმას გამართლება არასდროს აქვს და მისი ადმინისტრაციის მიერ ისრაელის უსაფრთხოების მხარდაჭერა მყარი და ურყევია.

7 ოქტომბერს ღაზას სექტორიდან ისრაელის მიმართულებით ასობით რაკეტა გაუშვეს. ქვეყნის მასშტაბით განგაშის სირენები ამოქმედდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო და თქვა, რომ 20 წუთში 5 000 რაკეტა გამოიყენეს.

გავრცელებულ შეტყობინებაში, ჰამასის სამხედრო მეთაურმა, მოჰამედ დეიფმა ამას ოპერაცია "ალ-აკსას წარღვნა" უწოდა და პალესტინელებს შეერთებისკენ მოუწოდა.

ისრაელის შეიარაღებულმა ძალებმა ჰამასის წინააღმდეგ საპასუხო დარტყმები განახორციელეს - მათ სამხედროების მობილიზება დაიწყეს და "საომარი მდგომარეობის" შესახებ გაფრთხილება გამოაცხადეს.

ისრაელის პრემიერმინისტრმა, ბენიამინ ნეთანიაჰუმ ამას ომი უწოდა - მისი თქმით, წინ ხანგრძლივი ბრძოლა ელით, თუმცა ისრაელი ომს მოიგებს, ხოლო ჰამასი პასუხს აგებს ამ ქმედებებისთვის.