ლიბანიდან ისრაელზე მიტანილ სარაკეტო თავდასხმაზე პასუხისმგებლობა ჰამასმა აიღო
ლიბანიდან ჩრდილოეთ ისრაელზე განხორციელებულ სარაკეტო იერიშზე პასუხისმგებლობა ჰამასმა აიღო.
ტერორისტული ჯგუფი გავრცელებულ განცხადებაში ამბობს, რომ ლიბანში მათმა დანაყოფებმა ისრაელის მიმართულებით 30-მდე რაკეტა გაუშვეს.
მანამდე ისრაელის თავდაცვის ძალებმა თქვეს, რომ ლიბანიდან ჩრდილოეთ ისრაელში მდებარე დასახლებებში დაახლოებით 20 რაკეტა ისროლეს. IDF-ში აღნიშნავდნენ, რომ მათ თავდასხმას საარტილერიო ცეცხლით უპასუხეს.
***
7 ოქტომბერს ღაზის სექტორიდან ისრაელის მიმართულებით ათობით რაკეტა გაუშვეს. ქვეყნის მასშტაბით განგაშის სირენები ამოქმედდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო და თქვა, რომ 20 წუთში 5 000 რაკეტა გამოიყენეს.
გავრცელებულ შეტყობინებაში, ჰამასის სამხედრო მეთაურმა, მოჰამედ დეიფმა ამას ოპერაცია "ალ-აკსას წარღვნა" უწოდა და პალესტინელებს შეერთებისკენ მოუწოდა.
ისრაელის შეიარაღებულმა ძალებმა ჰამასის წინააღმდეგ საპასუხო დარტყმები განახორციელეს - მათ სამხედროების მობილიზება დაიწყეს და "საომარი მდგომარეობის" შესახებ გაფრთხილება გამოაცხადეს.
ისრაელის პრემიერმინისტრმა, ბენიამინ ნეთანიაჰუმ ამას ომი უწოდა - მისი თქმით, წინ ხანგრძლივი ბრძოლა ელით, თუმცა ისრაელი ომს მოიგებს, ხოლო ჰამასი პასუხს აგებს ამ ქმედებებისთვის.
