ხადარკოვსკი ნავალნიზე: ძალიან ნიჭიერი პოლიტიკოსი და მამაცი ადამიანი იყო, ის რეჟიმმა მოკლა
რუსი ბიზნესმენი და პუტინის რეჟიმის მიერ დევნილი მიხაილ ხადარკოვსკი ალექსეი ნავალნის ციხეში დაღუპვას ეხმაურება.
"პირველი რეაქცია იყო 2022 წლის 24 თებერვლის მსგავსი. ინტელექტუალურ დონეზე ვიცოდით, რომ ეს, შესაძლოა, მომხდარიყო. ემოციურად კი შეუძლებელია ამის დაჯერება. ალექსეი იყო ძალიან ნიჭიერი პოლიტიკოსი და ძალიან მამაცი ადამიანი, შეეძლო შეესრულებინა ძალიან მნიშვნელოვანი როლი რუსეთის მომავალში.
ის ფაქტი, რომ რეჟიმმა მოკლა ის და ის არის რეჟიმის მიერ მოკლული ოპოზიციის მეორე ლიდერი, ჩემი მეგობარი ბორის ნემცოვის შემდეგ, გვიჩვენებს, თუ როგორ მუშაობს ეს რეჟიმი. ეს არის აბსოლუტურად ბანდიტური რეჟიმი. რუსეთის ოპოზიცია ამას მოსკოვის ქუჩებში არჩევნების დღეს უპასუხებს ან ალექსეი ნავალნის დაკრძალვის დღეს, თუ ეს საერთოდ მოხდება", - აცხადებს ხადარკოვსკი.
***
რუსეთის სასჯელაღსრულების რეგიონული სამმართველო იუწყება, რომ რუსი ოპოზიციონერი პოლიტიკოსი ალექსეი ნავალნი გამოსასწორებელ კოლონიაში დაიღუპა.
ნავალნი 47 წლის იყო.
უწყებაში ამტკიცებენ, რომ ყველა საჭირო რეანიმაციული ღონისძიება ჩატარდა, თუმცა მისი გადარჩენა ვერ შეძლეს: "გარდაცვალების მიზეზი დგინდება".
კრემლის პროპაგანდისტული RT ირწმუნება, რომ ნავალნის გარდაცვალების მიზეზი შესაძლოა თრომბია.
დეკემბერში ალექსეი ნავალნი განსაკუთრებული რეჟიმის კოლონიაში გადაიყვანეს, რომელიც პოლარული წრის მიღმა მდებარეობს.
ალექსეი ნავალნი 2021 წელს დააკავეს, როდესაც გერმანიიდან რუსეთში დაბრუნდა, სადაც მოწამვლის შემდეგ მკურნალობას გადიოდა. მაშინ ივ როშეს საქმეზე პოლიტიკოსს პირობითი მსჯავრი რეალურით შეუცვალეს.
2022 წელს სასამართლომ ნავალნის 9 წლით თავისუფლების აღკვეთა მიუსაჯა და ის თაღლითობაში დაადანაშაულა. 2023 წლის აგვისტოს ე.წ. ექსტრემიზმის საქმეზე ნავალნის 19 წელი მიუსაჯეს. თავდაპირველად ნავალნი ვლადიმირის ოლქის ციხეში იმყოფებოდა. გასული წლის დეკემბერში კი მისი ეტაპირება მკაცრი რეჟიმის კოლონიაში მოხდა.
ეატპირების პერიოდში ალექსეი ნავალნის თანამოაზრეები და ადვოკატები 20 დღის განმავლობაში ვერ უკავშირდებოდნენ, 25 დეკემბერს კი ცნობილი გახდა, რომ ახალ ციხეში გადაიყვანეს.
3 კოლონიაში, რომელსაც "პოლარულ მგელსაც" უწოდებენ და სადაც ახლა ნავალნი იყო მოთავსებული, იმყოფებოდნენ YUKOS-ის ერთ-ერთი თანამფლობელი პლატონ ლებედევი, ასევე უკრაინელი რეჟისორი და აქტივისტი ოლეგ სენცოვი.
აღნიშნულ ციხეში პირობები საკმაოდ მკაცრია, მისვლაც საკმაოდ რთულია და წერილების მიწოდებაც გართულებულია.
