ქაშიბაძე: ლოტკინზე აფეთქების შედეგად დაშავებულის მდგომარეობა მძიმეა, დამწვარია სხეულის 48%

დამწვრობის ცენტრის ხელმძღვანელმა, გუგა ქაშიბაძემ ფორმულასთან საუბრისას განაცხადა, რომ დღეს დილით ლოტკინზე მომხდარი აფეთქების შედეგად დაშავებული ადამიანის მდგომარეობა სერიოზულია და ის, ამ დროისთვის, რეანიმაციაში იმყოფება.

მისი თქმით, დაშავებულს სხეულის 48% აქვს დამწვარი.

"დამწვრობა აქვს 48%. ეს არის სახე, ზემო კიდურები, გულ-მკერდი და ზურგის ნაწილი. აქვს სასუნთქის გზების დაზიანება. მოთავსებულია რეანიმაციაში. სავარაუდოდ, გაზის აფეთქების შედეგად აქვს მიღებული დაზიანებები. მდგომარეობა არის სერიოზული", - განაცხადა ქაშიბაძემ.

წუხელ თბილისში, სავარაუდოდ, გაზის გაჟონვის გამო, აფეთქება მოხდა.

არსებული ცნობით, აფეთქდა 2 კომერციული ფართი და 1 საცხოვრებელი ბინა.

ფორმულას შსს-ში განუცხადეს, რომ მომხდარზე გამოძიება სისხლის სამართლის კოდექსის 240-ე (სამთო, სამშენებლო ან სხვა სამუშაოს წარმოებისას უსაფრთხოების წესის დარღვევა) და 240-ე პრიმა ( ელექტრო- ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევა) მუხლებით მიმდინარეობს.