ევროკომისიის სპიკერი: შეშფოთებულები ვართ საქართველოში დემოკრატიის უკუსვლის გამო

ევროკომისიის სპიკერის გიომ მერსიეს განცხადებით, შეშფოთებული არიან საქართველოში დემოკრატიული უკუსვლის გამო, რაც მისი თქმით, უფრო ართულებს ქვეყნისთვის ევროინტეგრაციის პროცესს.

მან ასევე ისაუბრა კომისარ მარტა კოსის ვიზიტზე სამხრეთ კავკასიის რეგიონში, კერძოდ, სომხეთსა და აზერბაიჯანშიც.

მერსიეს განცხადებით, ეს არის შესაძლებლობა ევროკომისიამ გააძლიეროს თავისი კავშირები აღნიშნულ რეგიონთან.

"კომისარ კოსის ვიზიტი სომხეთსა და აზერბაიჯანში სამშვიდობო პროცესის კონტექსტში უნდა განვიხილოთ. ეს ნამდვილად გადამწყვეტი მომენტია სამხრეთ კავკასიის რეგიონისთვის. კომისარი კოსი გამოიყენებს ამ შესაძლებლობას, რომ კიდევ ერთხელ დაადასტუროს ევროკავშირის მტკიცე ერთგულება სამშვიდობო პროცესისა და რეგიონში ვითარების სრული ნორმალიზაციის მიმართ. მის ვიზიტის გზავნილი ჩვენი მხრიდან არის მკაფიო, რომ ახლა ჩვენთვის არსებობს შესაძლებლობა, გავაძლიეროთ ჩვენი კავშირები და თანამშრომლობა რეგიონში. თქვენ ახსენეთ შავი ზღვის სტრატეგია, ეს ჩვენთვის ნამდვილად მნიშვნელოვანია, რადგან დარწმუნებული ვართ, რომ ხელს შეუწყობს მთელი რეგიონის განვითარებას.

რაც შეეხება საქართველოში არსებულ ვითარებას, ჩვენი პოზიცია ცნობილია. ჩვენ სერიოზულაც შეშფოთებული ვართ ბოლო დროინდელი დემოკრატიული უკუსვლის გამო, რაც ქვეყანას კიდევ უფრო აშორებს ევროკავშირის გზას", - განაცხადა ევროკომისიის სპიკერმა.

ცნობისთვის, კომისარი მარტა კოსი ვიზიტით სამხრეთ კავკასიაში იმყოფება.

იგი ესტუმრება სომხეთსა და აზერბაიჯანს, თუმცა იგი ვიზიტს არ განახორციელებს საქართველოში.