"ერთ-ერთს სხეულზე ხილული დაზიანებები აღენიშნებოდა" - ომბუდსმენი კენჭიაშვილსა და კორძაიაზე

სახალხო დამცველის ინფორმაციით, ომბუდსმენის წარმომადგენლებმა საქალაქო სასამართლოს მიმდებარედ ადმინისტრაციული წესით დაკავებული ორი პირი მოინახულეს.

მათი თქმით, დაკავებულებმა პოლიციის მხრიდან შესაძლო ძალის გადამეტებისა და არასათანადო მოპყრობის შესახებ განაცხადეს. ერთ-ერთ მათგანს სხეულზე აღენიშნებოდა ხილული დაზიანებები, ძირითადად, შეშუპებები, სიწითლეები, სისხლნაჟღენთები და ნაკაწრები კიდურებზე.

"სახალხო დამცველის აპარატმა არასათანადო მოპყრობის ფაქტებზე შესაბამისი სამართლებრივი რეაგირების მიზნით, უკვე მიმართა სპეციალურ საგამოძიებო სამსახურს და შემდგომშიც გააგრძელებს მიმდინარე სამართალწარმოების მონიტორინგს", - ნათქვამია განცხადებაში.

სალომე კენჭიაშვილი და ალბი კორძაია თბილისის საქალაქო სასამართლოსთან გუშინ, 22 მაისს დააკავეს.