ელისეის სასახლე: დეზინფორმაცია იმდენად შორს მიდის, რომ ცხვირსახოცი ნარკოტიკს ემსგავსება

საფრანგეთის პრეზიდენტის ადმინისტრაციაში ტყუილი უწოდეს რუსულ მედიასაშუალებებსა და მოგვიანებით, სოციალურ ქსელებში გავრცელებულ ინფორმაციას, რომლის თანახმადაც, კიევში მატარებლით მიმავალ საფრანგეთის პრეზიდენტ ემანუელ მაკრონს, დიდი ბრიტანეთის პრემიერ-მინისტრ კირ სტარმერსა და გერმანიის კანცლერ ფრიდრიხ მერცს თითქოს მაგიდაზე ნარკოტიკული საშუალება ედოთ.

„ევროპული ერთიანობა როდესაც დისკომფორტი ხდება, დეზინფორმაცია იმდენად შორს მიდის, რომ უბრალო ცხვირსახოცი ნარკოტიკს ემსგავსება. ეს ყალბი ამბავი საფრანგეთის მტრებმა გაავრცელეს, როგორც საზღვარგარეთ, ისე ქვეყანაში. უნდა შევინარჩუნოთ სიფხიზლე ასეთი მანიპულაციების წინააღმდეგ“, – აღნიშნულია განცხადებაში.

ელისეის სასახლის მიერ გავრცელებულ ფოტომასალაში ჩანს, რომ ემანუელ მაკრონის წინ ქაღალდის ცხვირსახოცი დევს და დასათაურებულია: „ეს არის ცხვირსახოცი ცხვირის მოსახოცად“, მეორე ფოტოზე კი, სადაც სამივე ლიდერი ერთად ჩანს, მითითებულია, რომ „ეს არის ევროპული ერთიანობა. მშვიდობის დასამყარებლად“.