დონალდ ტრამპმა მსოფლიოს ქვეყნებს ტარიფები დაუწესა, მათ შორის საქართველოს - 10%-იანი
აშშ-ის პრეზიდენტმა დონალდ ტრამპმა მსოფლიოს ქვეყნებს ახალი ტარიფები დაუწესა, ეს შეფასდა, როგორც ე.წ. სავაჭრო ომის გამოცხადება მსოფლიოსთვის.
დონალდ ტრამპის სამიზნეები გახდნენ როგორც მოკავშირეები, ასევე კონკურენტები, მათ შორის დიდი ბრიტანეთი, ავსტრალია, ევროკავშირი და ჩინეთი, რომლის მიმართაც, 5 აპრილიდან 34%-იანი ტარიფი ამოქმედდება.
აშშ-მა უნივერსალური 10%-იანი ტარიფი დააწესა ყველა იმპორტზე ნებისმიერი ქვეყნისთვის, მათ შორის საქართველოსთვის, სომხეთისთვისა და აზერბაიჯანისთვის.
დონალდ ტრამპის გადაწყვეტილებით, ევროკავშირს 20%-იანი ტარიფი ექნება, დიდ ბრიტანეთს კი - 10%-იანი. ურსულა ფონ დერ ლაიენი დონალდ ტრამპის გადაწყვეტილებას განცხადებით გამოეხმაურა და თქვა, რომ ახალი ტარიფები მილიონობით ადამიანს მძიმე შედეგებს მოუტანს.
სიაში არ არის რუსეთი. ახალი ტარიფები არ ეხება კანადასა და მექსიკას.
"ეს არის გათავისუფლების დღე. 2025 წლის 2 აპრილს ყოველ წელს გაიხსენებენ, როგორც ამერიკის ინდუსტრიის ხელახლა დაბადების დღეს, როდესაც ამერიკამ თავისი ბედი დაუბრუნა და გაიხსენებენ დღედ, როცა დავიწყეთ ამერიკა ისევ მდიდარ ქვეყნად გვექცია. ხელი მოვაწერე აღმასრულებელ განკარგულებას საპასუხო ტარიფების დაწესების შესახებ მთელი მსოფლიოს ქვეყნებისთვის, ეს არის საპასუხო, რაც ნიშნავს, რომ ისინიც ამას გვიკეთებენ და ჩვენც ამას ვუკეთებთ, ძალიან მარტივია, ამაზე მარტივად ვერ ვიტყვი.
ჩემი აზრით, ძალიან მნიშვნელოვანი დღეა ამერიკის ისტორიაში, ეს არის ჩვენი ეკონომიკური დამოუკიდებლობის დეკლარაცია. მშრომელი ამერიკელი მოქალაქეები იძულებული იყვნენ, ყოფილიყვნენ გვერდით გაწეული, მაშინ როდესაც სხვა ქვეყნები მდიდრდებოდნენ და ძლიერდებოდნენ, მეტ წილად ჩვენს ხარჯზე. ახლა ჩვენი აყვავების დროა", - თქვა დონალდ ტრაპმა.
