ბოსნიელი სერბი ლიდერი მოსკოვში გაიქცა – ბოსნია ინტერპოლის დაკავების ორდერს ითხოვს

ბოსნიელი სერბების ლიდერი მილორად დოდიკი მოსკოვში გამოჩნდა მას შემდეგ, რაც სარაევოს ხელისუფლებამ მის წინააღმდეგ საერთაშორისო დაკავების ორდერის – "წითელი ცირკულარის" – გამოცემა მოითხოვა.

დოდიკი, რომელიც ბოსნია და ჰერცეგოვინას საკონსტიტუციო სასამართლოს გადაწყვეტილებების უგულებელყოფისა და სეპარატისტული პოლიტიკის გატარებისთვის ერთწლიანი პატიმრობითა და ექვსწლიანი პოლიტიკური საქმიანობის აკრძალვით დასაჯეს, საკუთარ ადგილსამყოფელს ვიდეომიმართვით ადასტურებს.

ბოსნიის ხელისუფლება მისი დაკავებისგან თავდაპირველად თავს იკავებდა, პოლიტიკური ესკალაციის თავიდან ასაცილებლად, თუმცა დოდიკის ქვეყნიდან გასვლის შემდეგ ოფიციალურად მიმართა ინტერპოლს საერთაშორისო დაკავების მოთხოვნით.

ბოსნიელი სერბი პოლიტიკოსი ბოლო სამი ათწლეულის განმავლობაში ერთ-ერთი ყველაზე გავლენიანი ფიგურაა ეთნიკურად გაყოფილ ქვეყანაში.

დოდიკის მოსკოვში გაქცევა ბალკანელი პოლიტიკური ფიგურების მსგავს ქმედებებს ემთხვევა – რუსეთის ხელისუფლებამ არაერთხელ უარყო ინტერპოლის ორდერები, როცა საქმე მისთვის პოლიტიკურად სასარგებლო ფიგურებს შეეხებოდა.