აშშ-ის სახელმწიფო დეპარტამენტი USAID-ის გაუქმებას იწყებს
აშშ-ის სახელმწიფო დეპარტამენტმა კონგრესს ოფიციალურად აცნობა, რომ საერთაშორისო განვითარების სააგენტო (USAID) ფაქტობრივად უქმდება, ხოლო მისი ზოგიერთი ფუნქცია დეპარტამენტში გადაინაცვლებს.
გადახალისების პროცესი 1 ივლისისთვის დასრულდება. ეს გადაწყვეტილება USAID-ის მუშაობის შეწყვეტას ნიშნავს – სააგენტოს, რომელიც მთელ მსოფლიოში სიღარიბესა და შიმშილს ებრძოდა.
USAID-ის გაუქმება, რომელიც კონგრესის მიერ იყო შექმნილი, საკანონმდებლო ორგანოს ჩარევის გარეშე ხორციელდება, რაც, სავარაუდოდ, სამართლებრივ დავებს გამოიწვევს.
დონალდ ტრამპის ადმინისტრაციამ სააგენტო არაერთხელ დაადანაშაულა გადასახადის გადამხდელთა თანხების არაეფექტურად ხარჯვასა და ისეთ პროგრამების დაფინანსებაში, რომლებიც აშშ-ის ეროვნულ ინტერესებს არ ემსახურებოდა. მიუხედავად ამისა, ყოფილი და მოქმედი თანამშრომლები აღნიშნავენ, რომ USAID მნიშვნელოვან ჰუმანიტარულ მისიებს ასრულებდა და აშშ-ის რბილი ძალის გაძლიერებას უწყობდა ხელს.
USAID-ის დათხოვნა ილონ მასკის "სამთავრობო ეფექტიანობის დეპარტამენტის" (DOGE) ერთ-ერთი პირველი სამიზნე გახდა, რომელიც ფედერალური მთავრობის მასშტაბით ათასობით სამუშაო ადგილსა და პროგრამას ამცირებს.
USAID-ის დარჩენილ თანამშრომლებს უკვე დაეგზავნათ შემცირების შეტყობინებები. სააგენტოს ფუნქციების ნაწილი, როგორიცაა ჰუმანიტარული დახმარება, გლობალური ჯანმრთელობა და ეროვნული უსაფრთხოების პროგრამები, სახელმწიფო დეპარტამენტში გადაინაცვლებს, ხოლო დუბლირებული ფუნქციები გაუქმდება.
