აშშ და დიდი ბრიტანეთი თავის მოქალაქეებს ლიბანის დატოვებისკენ მოუწოდებენ

ამერიკის შეერთებული შტატებისა და დიდი ბრიტანეთის საელჩოები საკუთარ მოქალაქეებს მოუწოდებენ, სანამ კომერციული ფრენები ხელმისაწვდომია, ლიბანი დატოვონ.

მიზეზად ქვეყნები ისრაელი-ლიბანის საზღვარზე არსებულ დაძაბულობას ასახელებენ.

დღეს ლიბანიდან ჩრდილოეთ ისრაელზე სარაკეტო იერიში განხორციელდა, რომელზეც პასუხისმგებლობა ჰამასმა აიღო. ისრაელმა თავდასხმას საარტილერიო ცეცხლით უპასუხა.

***

7 ოქტომბერს ღაზის სექტორიდან ისრაელის მიმართულებით ათობით რაკეტა გაუშვეს. ქვეყნის მასშტაბით განგაშის სირენები ამოქმედდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო და თქვა, რომ 20 წუთში 5 000 რაკეტა გამოიყენეს.

გავრცელებულ შეტყობინებაში, ჰამასის სამხედრო მეთაურმა, მოჰამედ დეიფმა ამას ოპერაცია "ალ-აკსას წარღვნა" უწოდა და პალესტინელებს შეერთებისკენ მოუწოდა.

ისრაელის შეიარაღებულმა ძალებმა ჰამასის წინააღმდეგ საპასუხო დარტყმები განახორციელეს - მათ სამხედროების მობილიზება დაიწყეს და "საომარი მდგომარეობის" შესახებ გაფრთხილება გამოაცხადეს.

ისრაელის პრემიერმინისტრმა, ბენიამინ ნეთანიაჰუმ ამას ომი უწოდა - მისი თქმით, წინ ხანგრძლივი ბრძოლა ელით, თუმცა ისრაელი ომს მოიგებს, ხოლო ჰამასი პასუხს აგებს ამ ქმედებებისთვის.