აგენტების კანონის წინააღმდეგ საპროტესტო აქციებზე ორ დაკავებულს პატიმრობა მიესაჯა

აგენტების კანონის მოწინააღმდეგეთა აქციაზე პოლიციელზე თავდასხმისა და სხვისი ნივთის დაზიანების ბრალდებით დაკავებული გიორგი კუჭუაშვილი და დავით კოლდარი სასამართლომ დამნაშავედ ცნო.

თბილისის საქალაქო სასამართლოს მოსამართლე მიხეილ ჯინჯოლიამ კუჭუაშვილს 4 წლით, ხოლო კოლდარს 2 წლითა და 3 თვით წლით თავისუფლების აღკვეთა მიუსაჯა.

დავით კოლდარი და გიორგი კუჭუაშვილი 12 მაისს დააკავეს.

კოლდარს ბრალი საქართველოს სისხლის სამართლის კოდექსის 187-ე პრიმა მუხლის პირველი ნაწილით წაუყენეს, რაც სხვისი ნივთის დაზიანებას გულისხმობს. ის წარდგენილ ბრალდებას სრულად აღიარებს.

კუჭუაშვილს ბრალდება საქართველოს სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა პოლიციელის სამსახურებრივ საქმიანობასთან დაკავშირებით) წარედგინა, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს. ის არ უარყოფს, რომ პოლიციელების მიმართულებით პლასტმასის ბოთლი ისროლა, თუმცა ბრალდების კვალიფიკაციას არ ეთანხმება - ამას პოლიციელზე თავდასხმად არ მიიჩნევს.