CANVAS-ის დირექტორი გიორგი მელაძე სასამართლოში გამოკითხვაზე იმყოფება
CANVAS-ის დირექტორი, გიორგი მელაძე სასამართლოში გამოკითხვაზე იმყოფება. მან უარი თქვა სუს-ში გამოკითხვაზე და კითხვებს მაგისტრანტი მოსამართლის წინაშე პასუხობს.
მელაძის თქმით, დღეს მთავრობა ცდილობს, კბილებით გაათრიოს პოლიციური სახელმწიფოს კიდევ ერთი კანონი, რომლითაც მანიფესტაციებსა და შეკრების თავისუფლებას შეზღუდავს.
"ალბათ, ყველაფერს გააკეთებენ ასეთი ყალბი სიუჟეტებით, მონტაჟის გავრცელებით, რომ მაქსიმალურად ყურადღება აარიდონ ამ მთავარ პრობლემას. დღეს ჩვენი მთავარი პრობლემა არის, ხალხო, კანონი, ამიტომ, თქვენ თუ გაღელვებთ აი ეს მთელი სასამართლო გამოკითხვები, თუ გსურთ, რომ რამე ფორმით მხარი დაგვიჭიროთ ჩვენს ორგანიზაციას, ყველანი დღეთ 14:00 საათზე მიბრძანდით პარლამენტთან და შეუერთდით პროტესტს ამ კანონის წინააღმდეგ", - აცხადებს ის.
პარლამენტის იურიდიულ საკითხთა კომიტეტმა "შეკრებისა და მანიფესტაციის კანონში" შესატან ცვლილებებს მეორე მოსმენით მხარი დაუჭირა.
აღნიშნული კანონპროექტის გასაპროტესტებლად პარლამენტის შენობის უკანა შესასვლელთან 14:00 საათზე აქცია გაიმართება. აქციის ორგანიზატორები მოძრაობა ტალღის, ჯიუტის, სტუდენტები ევროპული მომავლისთვის წევრები არიან. ორგანიზატორების თქმით, "რუსულ მთავრობას არ გაატანინებენ მორიგი რუსული კანონის" დამტკიცებას.
***
შეკრებისა და მანიფესტაციების შესახებ კანონპროექტში ცვლილებებს პარლამენტში დაჩქარებული წესით განიხილავენ. ცვლილებების მიხედვით, საპროტესტო აქციებზე კარვებისა და დროებითი კონსტრუქციების მოწყობა აიკრძალება "თუ მისი მოწყობა საფრთხეს უქმნის შეკრების, ან მანიფესტაციის მონაწილეებს ან სხვა პირებს; ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას; იწვევს საწარმოს, დაწესებულების ან ორგანიზაციის ნორმალური ფუნქციონირების შეფერხებას; შეკრების ან მანიფესტაციის ჩატარებას არ უკავშირდება". დაუმორჩილებლობის შემთხვევაში ჯარიმა 500 ლარია, ხოლო მკაცრი მიდგომისას 15 დღემდე თავისუფლების აღკვეთაა.
კანონპროექტში ოცნების დეპუტატები აზუსტებენ, რომ თუ კანონდამრღვევი ორგანიზატორი აღმოჩნდება, მაშინ მას დანაშაულის გამოსყიდვა მეტად მკაცრი - 5 000 ლარიანი ჯარიმით ან 15-დღიანი პატიმრობით მოუწევს.
კანონპროექტის განმარტებით ბარათში რეგულაციების გამკაცრების მიზეზად 18 სექტემბერს, სახელმწიფო უსაფრთხოების სამსახურის მიერ გაკეთებული განცხადებაა მოყვანილი. სუს-ის მტკიცებით, გარკვეული ჯგუფები საქართველოში "ოქტომბერ-დეკემბერში დესტაბილიზაციას და ე.წ. კარვების ქალაქის გაშენებას გეგმავდნენ".
კანონპროექტის ავტორი და ინიციატორები არიან ქართული ოცნების დეპუტატები: ანრი ოხანაშვილი, ირაკლი ბერაია, გივი მიქანაძე, რატი იონათამიშვილი, ირაკლი შატაკიშვილი, თენგიზ შარმანაშვილი და ალექსანდრე ტაბატაძე.
არასამთავრობო ორგანიზაციები და ოპოზიციის წარმომადგენლები კანონპროექტს აკრიტიკებენ და აცხადებენ, რომ კანონის მიღების შემთხვევაში სამოქალაქო უფლებები კიდევ უფრო შეიზღუდება.
