ზურაბიშვილი: ჩვენთვის EU-ის გაფართოება ეგზისტენციალური საკითხია, არჩევანი არ გვაქვს
პრეზიდენტ სალომე ზურაბიშვილის თქმით, საქართველოსთვის ეგზისტენციალური საკითხია ევროკავშირის გაფართოება. ამის შესახებ მან მიუნხენის უსაფრთხოების კონფერენციაზე განაცხადა.
"ვიზიარებ იმას, რომ ცვლილებების პერიოდი დგას და ფეხი უნდა ავუწყოთ ამ პროცესს. ძალიან მნიშვნელოვანია და მინდა ხაზი გავუსვა, რომ ჩვენთვის ევროკავშირის გაფართოება ეგზისტენციალური საკითხი გახლავთ. ეს არ არის პროცედურული საკითხი, ეს არ არის იმაზე, ჩვენ მოგვწონს, თუ არ მოგვწონს. არჩევანი არ გვაქვს", - ამბობს პრეზიდენტი.
ზურაბიშვილის განცხადებით, მსოფლიო უნდა გაერთიანდეს, რათა ერთად დაამარცხონ რუსეთიდან მომდინარე საფრთხე.
"თუ შევხედავთ გლობალურ სურათს, ჩვენ დავინახავთ, რომ რუსეთი არამხოლოდ იპყრობს ქვეყნებს, ემუქრება ჩვენს ქვეყნებს კიბერთავდასხმით, ჰიბრიდული ომით, არამედ კოსმოსურ ომში სურს ჩართვა, რომელიც ჩვენი ქვეყნების კომუნიკაციას და ლოჯისტიკას დაემუქრება.
ვფიქრობ, რომ უნდა არსებობდეს კრეატიულობის ბიძგი, რომელიც მოგვცემს საშუალებას მოვაგვაროთ ეს საკითხები და ჩვენ შეგვიძლია, დავაჩქაროთ რეფორმები [საქართველოში], მაგრამ არაფერი არ შეცვლის იმ ფაქტს, რომ ჩვენ ერთად არ გაგვაჩნია სხვა ალტერნატივა, გარდა იმისა, რომ ვიყოთ ერთად - გაერთიანებულები, უფრო დემოკრატიულები და დავუპირისპირდეთ ავტოკრატიის ალიანსს, ტერორიზმს, კიბერთავდასხმებს - ყველა საფრთხეს, რომელიც ერთი მიმართულებიდან მომდინარეობს", - თქვა ზურაბიშვილმა.
მიუნხენის უსაფრთხოების კონფერენცია 16 თებერვალს დაიწყო და დღეს დამთავრდება. მასში მონაწილეობას დაახლოებით 50 სახელმწიფო მეთაური იღებს.
