ზელენსკი: ტრამპმა უკრაინისთვის განკუთვნილი 20,000 რაკეტა ახლო აღმოსავლეთში გადაამისამართა

უკრაინის პრეზიდენტმა ვოლოდიმირ ზელენსკიმ დაადასტურა, რომ აშშ-ის პრეზიდენტის, დონალდ ტრამპის ადმინისტრაციამ უკრაინისთვის განკუთვნილი 20,000 ერთეული დრონსაწინააღმდეგო რაკეტა ამერიკულ ძალებს ახლო აღმოსავლეთში გადაუმისამართა. ამის შესახებ მან ABC News-ისთვის მიცემულ ინტერვიუში 8 ივნისს განაცხადა.

ზელენსკის თქმით, უკრაინა დიდ იმედებს ამყარებდა აღნიშნულ რაკეტებზე რუსეთის დრონული თავდასხმების წინააღმდეგ ბრძოლაში, განსაკუთრებით იმ ფონზე, როცა მოსკოვი აქტიურად იყენებს ირანული წარმოების Shahed-ის ტიპის კამიკაძე დრონებს. 1 ივნისს, ერთ ღამეში, რუსეთმა 472 დრონი გამოუშვა — ეს რეკორდული მაჩვენებელია.

„ჩვენ დიდი პრობლემები გვაქვს შაჰედებთან… ყველაფერს ვიპოვით, რაც მათ გასანადგურებლად დაგვჭირდება,“ — განაცხადა ზელენსკიმ. „ჩვენ სწორედ ამ პროექტზე ვიყავით დამოკიდებული — 20,000 რაკეტა. ისინი ძვირი არ ღირს, მაგრამ სპეციფიკური ტექნოლოგიაა.“

ზელენსკის თქმით, აღნიშნული გეგმა თავდაპირველად შეთანხმებული იყო მაშინდელ თავდაცვის მინისტრ ლოიდ ოსტინთან და მისი განხორციელება უკვე ჯო ბაიდენის ადმინისტრაციის პერიოდში დაიწყო.