ვენეციის კომისია მანიფესტაციებზე ოცნების დრაკონულ კანონებს აკრიტიკებს

ვენეციის კომისია ერთპარტიული, არალეგიტიმური პარლამენტის მიერ ადმინისტრაციულ სამართალდარღვევათა კოდექსში და შეკრება-მანიფესტაციის შესახებ კანონში დრაკონულ და რეპრესიულ ცვლილებებზე კრიტიკულ შეფასებას აქვეყნებს.

ვენეციის კომისია კანონში ცვლილებებს გადაუდებელი პროცედურით ევროპის საბჭოს საპარლამენტო ასამბლეის პრეზიდენტის თეოდოროს რუსოპულოს მოთხოვნით აფასებს.

ქართული ოცნების მიერ მიღებული ცვლილებების თანახმად, 60 დღემდე იზრდება ადმინისტრაციული პატიმრობის ვადა, მესაკუთრის თანხმობის გარეშე დახურულ სივრცესა და შენობებში აქციების ჩატარება და საჯარო კრიტიკა იკრძალება. ასევე, აქციის მონაწილეებს ეკრძალებათ ნიღბების ტარება და ლაზერის გამოყენება.

ვენეციის კომისიის შეფასების თანახმად, კანონპროექტები დაჩქარებულად, შესაბამისი დაინტერესებული მხარეების ჩართულობის გარეშე იქნა მიღებული.

"ეს ძირს უთხრის ცვლილებების ლეგიტიმურობას, განსაკუთრებით მასობრივი აქციების ფართო პოლიტიკური კონტექსტის გათვალისწინებით".

ვენეციის კომისია აღნიშნავს, რომ არ არის შეფასებული ორ ეტაპად მიღებული მასშტაბური ცვლილებების პროპორციულობა და ამის შედეგად "კანონშემოქმედებითი პროცესი შეიძლება ფუნდამენტურად ხარვეზიანად ჩაითვალოს".

"ცვლილებებით მოიცავს არაერთ ბუნდოვან და ფართოდ ფორმულირებულ დებულებას, რაც ხელისუფლებას მათ გამოყენებაში ზედმეტად ფართო დისკრეციას ანიჭებს. ეს ძირს უთხრის სამართლებრივი ჩარჩოს განჭვრეტადობას, აზიანებს სამართლებრივ უსაფრთხოებას ძირითადი თავისუფლებების განხორციელებისას. სამართლებრივ ჩარჩოში სიცხადის ნაკლებობა ზრდის მისი ბოროტად გამოყენების რისკს

სხვადასხვა შემაკავებელი ზომების შემოღების აუცილებლობა და პროპორციულობა ცვლილებებში არ არის სათანადოდ დასაბუთებული. ახალი მკაცრი საპატიმრო სასჯელები, თან ადმინისტრაციულ სამართალდარღვევებზე ჯარიმების არსებით ზრდასთან ერთად, გადაჭარბებული ჩანს. ამ ზომებს, სავარაუდოდ, მსუსხავი ეფექტი ექნება შეკრების თავისუფლებაზე"- წერია შეფასებაში.

ვენეციის კომისიის რეკომენდაციებია:

• სანქციების ხასიათისა და სიმძიმის გადახედვა
• ადმინისტრაციული დაკავების დანიშვნამდე ინდივიდუალური შეფასების მკაფიო კრიტერიუმების შემოღება, რომელიც შეესაბამება ადამიანის უფლებათა ევროპული კონვენციის (ECHR) მე-5 მუხლის 1-ელ პუნქტს
• ადმინისტრაციული დაკავების წინააღმდეგ ეფექტური პრევენციული საშუალების უზრუნველყოფა
• კონკრეტული ვიწრო მნიშვნელობის განსაზღვრა ლაზერის და სინათლის სხვა მოწყობილობების აკრძალვაზე
• სახის დაფარვის აკრძალვის დაზუსტება
• "პოლიციის ფორმის მსგავსი ტანსაცმლისა და ატრიბუტიკის" მნიშვნელობის ზუსტი განსაზღვრა