ვანო ნადირაძის თქმით, თავისუფლების მოედანზე მის შვილს სცემეს

1-ელ მაისს თბილისში, თავისუფლების მოედანზე, უკრაინაში მებრძოლი ქართველის, ვანო ნადირაძის შვილს სცემეს. ინფორმაციას ამის შესახებ თავად მებრძოლი ავრცელებს.

ნადირაძის თქმით, მისი შვილი ხარებას დაჯგუფების წევრებმა მაშინ სცემეს, როდესაც რუსული კანონის საწინააღმდეგო აქციაზე მისასვლელად, თავისუფლების მოედანზე მანქანას აჩერებდა. იგი ასევე ამბობს, რომ ნაცემი ადამიანი ჯერ საავადმყოფოში, შემდეგ კი დუშეთის რაიონის იზოლატორში გადაიყვანეს, საიდანაც 48 საათის შემდეგ გაათავისუფლეს.

"სამი დღის უკან ჩემი შვილი სასტიკად იქნა ნაცემი თავისუფლების მოედანზე, იმ დროს როცა მანქანას აჩერებდა - არც კი იყო მისული პროტესტის ადგილამდე. მიესია ხარებას ბანდა, ხარებას თამადობით - ხარებაც უშუალოდ იქ იყო. სასტიკად სცემეს მხოლოდ იმიტომ, რომ ჩემი შვილი იყო. რის შედეგადაც, უკვე მძიმე მდგომარეობაში, ჯერ საავადმყოფოში გადაიყვანეს, შემდეგ დუშეთის რაიონის იზოლატორში", - განაცხადა ქართველმა მებრძოლმა.

ნადირაძე ასევე ამბობს, რომ მისი შვილს სხვადასხვა სახის პირადი ნივთებიც წაართვეს და უმეორებდნენ - ცემის ერთადერთი მიზეზი ის იყო, რომ იგი ვანო ნადირაძის შვილი იყო.

"ოჯახი და შვილი არის წმინდა. ახლა შენ [მიმართავს ხარებას] ალბათ ჩემს პასუხს უნდა ელოდო, მაგრამ შენს, თქვენს ოჯახებს ჩემთვის არაფერი დაუშავებიათ. ასე, რომ, დღესდღეობით, ჩვენს ახალ, ლამაზ თაობას, რომელთაც მოძრაობა აქვთ დაწყებული სამშობლოსათვის, მე არ მაქვს უფლება, რომ ჩემი რაღაც მოქმედებით ხელი შევუშალოთ. იმისთვის, თქვენ რუსმა კაგებეშნიკებმა რამე ჩირქი არ მოსცხოთ და შავი პიარი არ აუგოროთ. ეს განათლებული თაობა მართლაც ბოლოს მოგიღებთ", - ამბობს ვანო ნადირაძე.