უნგრეთი სისხლის სამართლის საერთაშორისო სასამართლოს ტოვებს

უნგრეთმა სისხლის სამართლის საერთაშორისო სასამართლოს (ICC) დატოვების გადაწყვეტილება მიიღო. ქვეყნის მთავრობამ ეს გადაწყვეტილება ბუდაპეშტში ისრაელის პრემიერის ბენიამინ ნეთანიაჰუს ვიზიტის ფონზე მიიღო.

ბენიამინ ნეთანიაჰუ პირველად ესტუმრა უნგრეთს მას შემდეგ, რაც სისხლის სამართლის საერთაშორისო სასამართლომ მის მიმართ დაკავების ორდერი გასცა.

2024 წლის 21 ნოემბერს ICC-მა ისრაელის პრემიერმინისტრის, თავდაცვის ყოფილი მინისტრისა და ჰამასის სამხედრო მეთაურის მიმართ დაკავების ორდერები გასცა.

მოსამართლეების მოსაზრებით, არსებობს "გონივრული ეჭვი", რომ სამივე პირს ომის დანაშაულებსა და კაცობრიობის წინააღმდეგ ჩადენილ დანაშაულებზე პასუხისმგებლობა ეკისრებათ.

ამ გადაწყვეტილებიდან მეორე დღეს, 22 ნოემბერს ვიქტორ ორბანმა განაცხადა, რომ უნგრეთში ისრაელის პრემიერს ბენიამინ ნეთანიაჰუს მიიწვევს და უზრუნველყოფს, რომ სისხლის სამართლის საერთაშორისო სასამართლოს (ICC) მიერ გაცემული ორდერი არ აღსრულდეს.

ვიქტორ ორბანმა სახელმწიფო რადიოსთან თქვა, რომ ICC-ის მიერ გაცემული ორდერი "არასწორია" და დასძინა, რომ ისრაელის ლიდერი "ადეკვატური უსაფრთხოების პირობებში" უნგრეთში მოლაპარაკებების წარმოებას შეძლებს.