ტრამპი ზელენსკიზე: ის ახლა უფრო მშვიდია და შეთანხმების მიღწევას ცდილობს

აშშ-ის პრეზიდენტმა დონალდ ტრამპმა განაცხადა, რომ მას შემდეგ, რაც ვატიკანში ვოლოდიმირ ზელენსკის შეხვდა, უკრაინის პრეზიდენტი უფრო "მშვიდი" და "მშვიდობის შეთანხმების მიღწევით დაინტერესებული" ეჩვენება.

ტრამპმა შეხვედრა "ლამაზად" შეაფასა და აღნიშნა, რომ 15-წუთიანი საუბრებისას ზელენსკიმ მას დამატებითი იარაღის მიწოდება სთხოვა.

მათ შორის ასევე მოკლედ განიხილეს ყირიმის საკითხი. ტრამპის თქმით, ამერიკული სამშვიდობო წინადადების ფარგლებში, აშშ მზად იქნებოდა ყირიმი რუსეთის ტერიტორიად ეღიარებინა, თუმცა ზელენსკიმ ეს წინადადება უარყო.

ტრამპმა უარყო, რომ ზელენსკისთან ურთიერთობა ოდესმე გაფუჭებული ჰქონოდა და აღნიშნა, რომ მათი თებერვალში სატელევიზიო დისკუსია მხოლოდ "პატარა დაბრკოლება" იყო.

"ახლა ის უფრო მშვიდია. მგონია, რომ კარგად აანალიზებს სიტუაციას და შეთანხმების მიღწევას ცდილობს," — თქვა ტრამპმა.

ტრამპის თქმით, რუსეთის პრეზიდენტმა ვლადიმერ პუტინმა უნდა აჩვენოს რეალური სურვილი ომის დასრულებისკენ.

"მინდა, რომ შეწყვიტოს სროლა, დაჯდეს მოლაპარაკებებზე, მოაწეროს ხელი შეთანხმებას და უბრალოდ დაუბრუნდეს ცხოვრების ჩვეულ რიტმს," — დასძინა ტრამპმა.