სინდისის პატიმრების ოჯახის წევრები საზოგადოებრივ მოძრაობას ქმნიან

სინდისის პატიმრების ოჯახის წევრები საზოგადოებრივ მოძრაობას ქმნიან. ამის შესახებ მათ რუსთაველის გამზირზე, პარლამენტის წინ გამართულ საპროტესტო აქციაზე ისაუბრეს.

"ჩვენ, სინდისის პატიმრების მშობლები და ოჯახის წევრები ვქმნით საზოგადოებრივ მოძრაობას სინდისის პატიმრების თავისუფლებისთვის.

გვინდა დავიწყოთ წინადადებით - 2008 წლის აგვისტოს ომი დაიწყო რუსეთმა, აფხაზეთი და სამაჩაბლო საქართველოა! მადლობა ყველა ჯარისკაცს, გენერალსა და საქართველოს შეიარაღებულ ძალებს, ვინც წვლილი შეიტანა ჩვენი ქვეყნის დაცვასა და შეუდრეკელი სულისკვეთებისთვის, ვინც დღემდე მოგვიყვანა. ქედს ვიხრით თქვენი თავდადებისა და ბრძოლისთვის.

შესაბამისად, არავის მივცემთ იმის უფლებას, რომ ეჭვი შეიტანონ თქვენს სულისკვეთებასა და პატრიოტიზმში. დავიცავთ საქართველოს დამოუკიდებლობისა და თავისუფლებისთვის მებრძოლ შვილებს, ძმებს, დებსა და ყველა იმ ადამიანს, ვინც იბრძვის იდეისთვის და არ დავუშვებთ უდანაშაულოდ მათ ციხეში დარჩენას. ვიღებთ პასუხისმგებლობას, რომ ბოლომდე ვიბრძოლებთ მათი გათავისუფლებისთვის.

მოვითხოვთ, ყველა უკანონო პატიმრის გათავისუფლებას; ახალი, თავისუფალი და სამართლიანი არჩევნების დანიშვნას, სადაც ხალხი თავისუფლად გადაწყვეტს საკუთარი ქვეყნის მომავალს.

ჩვენ, ვუხმობთ ყველას, ვისთვისაც ძვირფასია თავისუფლება და სამართლიანობა, სამოქალაქო საზოგადოებას, პოლიტიკურ პარტიებს, სტუდენტებს, მედიას, ხელოვნებს, მასწავლებლებს, ექიმებს, მთელ საქართველოს. ეს არ არის მხოლოდ ჩვენი შვილების ან ერთი ჯგუფის ბრძოლა. ეს არის ბრძოლა ყველასთვის, ვისაც არ სურს დიქტატურა, რუსეთის გავლენა და უსამართლობა.

დღეს, ჩვენ ვიწყებთ ახალ წინააღმდეგობის მოძრაობას, რომელიც იქნება მტკიცე და შეუპოვარი. გთხოვთ, შემოგვიერთდეთ ამ ბრძოლაში, რათა ერთად დავიცვათ ჩვენი ქვეყნის მომავალი," - ნათქვამია რეჟიმის პატიმრების ოჯახის წევრების ერთობლივი განცხადებაში.

მათი თქმით, ისინი 8 აპრილს მემორიალთან შეიკრიბებიან და ღამეს გაათევენ.

ამასთან, სინდისის პატიმრების ოჯახის წევრებმა განაცხადეს, რომ ისინი იტოვებენ უფლებას, პროტესტის მკაცრსა და რადიკალურ ფორმებს მიმართონ.

"საქართველოს არალეგიტიმურსა და თვითმარქვია ხელისუფლებას მოგიწოდებთ, მაქსიმალურად მოკლე ვადებში მიიღოთ ქვეყნისთვის, მისი მშვიდობისა და სტაბილურობისთვის, ევროპული მომავლისთვის მნიშვნელოვანი, სწორი გადაწყვეტილება და გაათავისუფლოთ პოლიტიკური ტყვეობიდან ყველა სინდისის პატიმარი, ასევე დანიშნოთ ახალი საპარლამენტო არჩევნები...

იმ შემთხვევაში, თუ არალეგიტიმური ხელისუფლება არ მიიღებს ამ გადაწყვეტილებას, მაშინ ქვეყანაში განვითარებულ მოვლენებზე პასუხისმგებლობა დაეკისრება მას. ქვეყანაში რევოლუციას აწყობს არა ხალხი, არამედ ხელისუფლების უსამართლო და უგუნური გადაწყვეტილებები.

ჩვენ, ლეგიტიმური და სამართლიანი მოთხოვნების უგულებელყოფის შემთხვევაში, პოლიტიკური და სინდისის პატიმრების მშობლები და ოჯახის წევრები ვიტოვებთ უფლებას, მივმართოთ პროტესტის უფრო მკაცრ და რადიკალურ ფორმებს, სახელმწიფო დაწესებულებების პიკეტირებას, საერთაშორისო მაგისტრალების გადაკეტვას, კორუმპირებული ჩინოვნიკებისთვის, დასანქცირებული და ასევე კორუმპირებული მოსამართლეებისა და პროკურორებისთვის, მინისტრებისთვის და სხვა ჩინოვნიკებისთვის ყველგან და ყოველთვის დისკომფორტის შექმნას", - განაცხადეს მათ.