სასამართლომ ხოშტარიას 5000 ლარის ოდენობით საპატიმრო გირაო შეუფარდა
"კოალიცია ცვლილებებისთვის" ერთ-ერთ ლიდერს ელენე ხოშტარიას სასამართლომ 5000 ლარის ოდენობით საპატიმრო გირაო შეუფარდა.
ხოშტარიას აღნიშნული თანხის გადასახდელად სასამართლომ 20-დღიანი ვადა განუსაზღვრა.
აღნიშნულ საქმეზე შემდეგი სასამართლო სხდომა 3 ნოემბერს გაიმართება.
რამდენიმე წუთის წინ გავრცელდა ოპოზიციონერი ლიდერის წერილი საპატიმრო დაწესებულებიდან.
იგი ამბობს, რომ გირაოს გადახდას არ პირებს და მოუწოდებს სხვებსაც, არ გადაიხადონ აღნიშნული თანხა.
***
ოპოზიციონერი ლიდერი პოლიციამ 15 სექტემბერს, კახა კალაძის საარჩევნო ბანერზე წარწერის გაკეთებისთვის დააკავა.
ხოშტარიას პროკურატურამ ბრალი სისხლის სამართლის კოდექსის 187-ე მუხლის პირველი ნაწილით (სხვისი ნივთის დაზიანება, რამაც მნიშვნელოვანი ზიანი გამოიწვია) წარუდგინა, რაც 1-დან 5 წლამდე პატიმრობას ითვალისწინებს.
"გამოძიებით დადგინდა, რომ ხოშტარიამ განზრახ დააზიანა ქართული ოცნების საარჩევნო შტაბზე განთავსებული სამი ბანერი, რამაც გამოიწვია ქონებრივი ზიანი 570 ლარის ოდენობით", - წერს პროკურატურა.
