ყოფილი ცოლის ბინაში მოსასმენი აპარატურის დაყენებისა და მიყურადების ბრალდებით კაცი დააკავეს

სპეციალურმა საგამოძიებო სამსახურმა ყოფილი ცოლისთვის მოსასმენი აპარატურის დამონტაჟების და მიყურადების ბრალდებით კაცი დააკავა.

გამოძიების თანახმად, 1979 წელს დაბადებულმა ბრალდებულმა ყოფილი ცოლის ბინაში - მისაღებსა და საძინებელში - ფარულად დაამონტაჟა მოსასმენი მოწყობილობები, რომლებშიც განათავსა სიმ ბარათები და მათზე სატელეფონო ზარის განხორციელების გზით, თვეების განმავლობაში დაზარალებულების კერძო კომუნიკაციის უკანონოდ უსმენდა.

ბრალდებული სასამართლოს განჩინების საფუძველზე სისხლის სამართლის კოდექსის 158-ე მუხლის პირველი ნაწილით გათვალისწინებული დანაშაულისთვის იქნა დაკავებული.

დანაშაული 4 წლამდე თავისუფლების აღკვეთას ითვალისწინებს.