ფრანგების 68% მხარს უჭერს თავდაცვის ბიუჯეტის გაზრდას

საფრანგეთისა და ბრიტანეთის მოსახლეობის უმეტესობა თავდაცვის ბიუჯეტის გაზრდას უჭერს მხარს.

Ipsos-ის მიერ La Tribune Dimanche-ისთვის ჩატარებულმა გამოკითხვამ აჩვენა, რომ საფრანგეთში გამოკითხული 1,000 მოქალაქის 68% მხარს უჭერს თავდაცვის ბიუჯეტის გაზრდას, ხოლო 66% მიიჩნევს, რომ მისი დაფინანსება ბიუჯეტის დეფიციტის ხარჯზე უნდა მოხდეს.

გაერთიანებულ სამეფოში მსგავსი გამოკითხვით დადგინდა, რომ მოსახლეობის 44% მზად არის თავდაცვის ხარჯების გაზრდისთვის, თუნდაც ეს დამატებითი სამთავრობო სესხების აღებას, გადასახადების ზრდას ან სხვა საჯარო სერვისებისთვის თანხის შემცირებას ნიშნავდეს.

სამხედრო საკითხებზე კოორდინაციის მიზნით, საფრანგეთის, გაერთიანებული სამეფოს, გერმანიის, იტალიისა და პოლონეთის მინისტრები ოთხშაბათს პარიზში შეიკრიბებიან. ამასთან, საფრანგეთი სამშაბათს უმასპინძლებს ევროპის სამხედრო შტაბების ხელმძღვანელთა შეხვედრას.

საფრანგეთის თავდაცვის მინისტრმა სებასტიან ლეკორნიუმ La Tribune Dimanche-თან ინტერვიუში განაცხადა, რომ ქვეყნის სამხედრო ბიუჯეტის გაორმაგება სურს. მისი თქმით, ჯარების ოპტიმალური დაფინანსება წელიწადში დაახლოებით 100 მილიარდ ევროს (108 მილიარდი დოლარი) უნდა შეადგენდეს, რაც 2025 წლისთვის დაგეგმილი 50.5 მილიარდი ევროს ოდენობის ბიუჯეტზე თითქმის ორჯერ მეტია.

მიუხედავად იმისა, რომ საფრანგეთზე ბიუჯეტის დეფიციტის შემცირების ზეწოლა არსებობს, ევროკომისიის პრეზიდენტმა ურსულა ფონ დერ ლაიენმა განაცხადა, რომ ევროკავშირი წევრ ქვეყნებს თავდაცვის ინვესტიციებისთვის მეტი ფისკალური სივრცის უზრუნველყოფას შესთავაზებს.