პუტინი: თუ ზელენსკი მზადაა, დაე ჩამოვიდეს მოსკოვში და შეხვედრა შედგება

რუსეთის პრეზიდენტმა ვლადიმირ პუტინმა განაცხადა, რომ მზად არის უკრაინის ლიდერ ვოლოდიმირ ზელენსკისთან პირისპირ შეხვედრისთვის, თუმცა მხოლოდ იმ შემთხვევაში, თუ ის მოსკოვში ჩატარდება.

პუტინის თქმით, შეხვედრის ინიციატივა ამერიკის პრეზიდენტ დონალდ ტრამპს ეკუთვნის, რომელმაც ორივე ლიდერს რუსეთის ომის დასრულების მიზნით მოლაპარაკებებისკენ მოუწოდა.

„ვუთხარი, შესაძლებელია, დაე, მოსკოვში ჩამოვიდეს“, – აღნიშნა პუტინმა პეკინში, „გამარჯვების დღის“ აღლუმის შემდეგ გამართულ პრესკონფერენციაზე.

რუსეთის პრეზიდენტმა კვლავ დააყენა ზელენსკის ლეგიტიმურობის საკითხი, რაც კრემლის ერთ-ერთი მთავარი არგუმენტია მოლაპარაკებებზე უარის თქმისას.

პუტინის განცხადება მოჰყვა აგვისტოში გამართული შეხვედრების სერიას, რომელიც დონალდ ტრამპის ინიციატივით გაიმართა. ალასკაში პუტინთან გამართული მოლაპარაკებები შედეგიანად არ დასრულებულა, თუმცა ვაშინგტონში ზელენსკისთან და ევროპელ/NATO ლიდერებთან შეხვედრის შემდეგ, ტრამპს ომის დასრულების მიმართულებით პროგრესის დაჩქარება სურს.

მიუხედავად ამისა, კრემლმა არაერთხელ უარყო ზელენსკისთან უშუალო მოლაპარაკების შესაძლებლობა. პუტინმა კვლავ დაადანაშაულა დასავლეთი და NATO უკრაინის ომში, რომელიც 2022 წლის სრულმასშტაბიანი შეჭრით დაიწყო. მისი თქმით, ომი „უკრაინაში სახელმწიფო გადატრიალებით დაიწყო, რომელსაც დასავლეთი იჭერდა მხარს“, ხოლო მეორე მიზეზად „უკრაინის NATO-ში ჩართვის მცდელობა“ დაასახელა.