პროკურატურამ მამუკა ხაზარაძისთვის აღკვეთის ღონისძიების გამოყენებაზე სასამართლოს მიმართა

პროკურატურამ ძლიერი საქართველოს ლიდერისთვის მამუკა ხაზარაძისთვის აღკვეთის ღონისძიების გამოყენებაზე სასამართლოს უკვე მიმართა.

პროცესი თბილისის საქალაქო სასამართლოში ხვალ, 2 აპრილს, 13:00 საათზე ჩაინიშნა. საქმეს მოსამართლე არსენ კალატოზიშვილი განიხილავს.

პროკურატურამ ძლიერი საქართველოს ლიდერს მამუკა ხაზარაძეს ბრალი წაუყენა საქართველოს სისხლის სამართლის კოდექსის 349-ე მუხლით, რომელიც ქათული ოცნების პარლამენტის დროებითი საგამოძიებო კომისიის მოთხოვნის შეუსრულებლობას შეეხება.

მამუკა ხაზარაძე ბრალდებას პოლიტიკურ დევნად აფასებს და აცხადებს, რომ არ ცნობს არც პარლამენტს და არც საგამოძიებო კომისიას, რომელსაც ანტიეროვნული უწოდა. მისი თქმით, საქართველო მძიმე კრიზისშია და ბრძოლას მშვიდობიანი გზებით გააგრძელებს.

ქართული ოცნების არალეგიტიმური, ერთპარტიული პარლამენტის საგამოძიებო კომისიაზე გამოუცხადებლობა სისხლის სამართლის კოდექსით დასჯადი ქმედებაა და ერთ წლამდე თავისუფლების აღკვეთას ან ჯარიმას ითვალისწინებს.